Gobierno habri pa dialogo riba all inclusive y AHATA kier mas tempo

ORANJESTAD - Gobierno ta keda habri pa dialogo riba ley di all inclusive. Asina gobierno a declara pa medio di un comunicado den fin di siman. Segun minister encarga cu turismo Otmar Oduber 'Ta reuniendo continuamente cu gremionan pa yega na e miho producto di ley'. Segun e mandatario e ta na altura cu tin un interpretacion robes. "Tin hende ta bisa cu minister kier tin poder."  AHATA mientrastanto den un comunicado cu nan a manda riba e tema, ta pidi pa mas tempo y cu un regulacion manera cu gobierno kier implementa, aworaki no ta necesario. Segun Oduber  na prome luga den e cambio di ley ta stipula un periodo di 20 aña pa renoba permiso di hotel. "E minister aki no ta bay t'ey aki 20 aña. Kiermen mi no por ta creando ningun poder pa mi." Minister Oduber semper a mira e interes general di pais Aruba. AHATA ta mustra cu e rapport di PWC ta papia otro.

GARANTISA INVERSION Y STABILISACION

Segun e mandatario gobierno di Aruba kier garantisa inversion y stabilidad di companianan, y a bay mas leu cu e 5 añanan stipula y como tal a mara e permisonan pa hotel na 20 aña.   Oduber ta habri pa dialogo y lo por te hasta aumenta e cantidad di aña stipula si mester haci esaki. "Si kier bay na 25 of 30 aña mes no ta nada nos por papia riba esaki. Si mester adapta cierto puntonan den e ley cu ta trece garantia, nos lo haci'e. Mester stipula cierto criteria cu bo ta aproba of desaproba e permisonan. No por ta asina cu e ta keda na discrecion di e Minister na mando pa tuma un decision basa riba opinion personal. E ley t'ey pa mara un decision asina importante na cierto criterianan. Y esaki lo conta pa ken sea ta e minister of e hotel of e inversionista na e momento ey, basta cu ta cumpli cu e condicionnan mara den e ley." Ta un situacion similar cu esun di erfpacht unda un persona despues di 60 aña mester renoba esaki, pues e no ta un practica desconoci riba nos isla.

DICIDI RIBA CON HOTEL TIN CU MANEHA NEGOSHI

Un otro punto cu Minister Otmar Oduber a toca ta e insinuacionnan cu su persona lo kier dicidi con e hotelnan tin cu haci nan negoshi. E mandatario ta splica cu a sinta hunto cu AHATA, unda e organisacion cu ta representa mayoria hotel riba nos isla mes a bin cu e proposicion di e situacion actual, unda cu hotelnan ta uza entre 20% cu 10% di nan inventario di camber pa paketenan di All-inclusive,  unda Gobierno a dicidi di tuma e cantidad maximo cual ta e 20% pa stipula den e ley. "Ademas di esey nos a pone dos excepcion den e ley cu ta permiti tur locual ta MICE, convencionan, tur conferencianan ta ilimita riba e 20%."

AHATA TA DESMENTI

Sinembargo durante un programa siman pasa na ATV canal 15, miembro di AHATA y gerente di Renaissance Resorts Paul Gielen a desmenti esey. "Ningun momento nos a bisa esey" Gielen a sigura riba e pregunta cu si ta berdad cu hotelnan mes a sugeri esey. "Mi no sa unda na na saca esey" Gielen a sigui bisa. El a mustra cu ora cu AHATA a reclama 10% inicial pa e cantidad di inventario, gobierno ta esun cu a aumenta esaki na 20%. Pero no cu ta AHATA a bisa cu esey tabata e caso. 

AHATA KIER MAS TEMPO PA INVESTIGA E LEY

Den un comunicado diadomingo di AHATA nan ta mustra cu nan ta haya cu gobierno ta bayendo mucho pura, y kier mas tempo pa investiga e ley. "Nos kier haya e oportunidad pa por splica henter Conseho di Minister riba e proposicion riba mesa awor pa cambia e ley cu ta regula e permiso di operacion pa hotelnan", asina Aruba Hotel and Tourism Association a manda pidi gobierno den un carta diahuebs atardi laat. Segun e gremio, ta importante pa henter gobierno ta bon informa di tur detaye y di e consecuencianan cu e ley aki lo por trece cu ne. A pidi pa topa den Conseho di Minister di diabierna ultimo, pero esey no a logra.

REGULACION ASINA NO TA NECESARIO

E asociacion di hotel y turismo di nos pais a splica na mas di un ocasion cu un regulacion asina no ta necesario na e momento aki. E vision aki di AHATA ta sosteni pa e conclusionnan principal for di e rapport di PriceWaterhouseCoopers di Merca cu nan a prepara pa Aruba Tourism Authority (ATA) na aña 2015 titula "All Inclusive Analysis" y cual PWC mes a resumi como articulo # 6 den e documento titula "Synopsis: All Inclusive Hotels" cu nan a publica dia 26 di januari 2016.