Fundacion pa Hende Muhe den Dificultad cu fiesta di LUAU

ORANJESTAD - Recientemente Fundacion pa Hende Muhe den Dificultad (FHMD) a tene un conferencia di prensa pa, por medio di prensa, informa pueblo di Aruba tocante e grandioso fiesta di LUAU cu nan ta bay tene riba 25 di juni venidero. Na Parke Arawa, unda cu e fiesta lo tuma lugar, prensa a haña un toke y sabor di loke ta bay ta e fiesta aki, cu lo sirbi como fundraising pa e fundacion. Presidente di e fundacion, Sra. Suzy Kock a introduci e coordinadora nobo di e fundacion, Sra. Magaly Maduro, cu ta encarga cu e funcionamento diario di e kantoor y shelter di e fundacion. 

TOPICO DI VIOLENCIA TA TABU?

Segun Kock, e topico di Violencia Domestico no ta algo cu na Aruba nos gusta papia di dje y cu nos tine mas tanto scondi, pero cu e ta un realidad riba nos isla y ta locual cu primordialmente FHMD ta bin ta bringando y ofreciendo guia na su victimanan pa mas di 20 aña caba. E motibo pa cual FHMD ta teniendo e fiesta aki, cual motibo ta cu e fundacion mester di fondo pa sigui cu e trabou valioso cu nan ta bin ta haciendo pa e comunidad Arubiano. Manera nos tur sa subsidio na fundacionnan no ta suficiente pa cubri tur gastonan y awor mas cu nunca FHMD ta depende di e generosidad di comunidad pa sigui cu su trabou. 

TRABOU DI FHDM

Yvonne Spellen, presidente saliente y alabes vicepresidente nobo di FHMD, a splica un poco di e trabou di e fundacion pa duna sosten na e hende muhe den nos comunidad. E no ta un tarea facil manera Spellen ta splica, ya cu nos tur sa cu tin hopi decadencia di moralidad y responsabilidad den nos comunidad Arubano y cu sin e normanan di respet no solamente nos famia, pero tambe nos sociedad en totalidad lo sigui experencia e consequencianan negativo cu nos ta wak ya caba awendia. Pero segun Spellen, FHMD tin un team capacita y motiva cu ta traha incansablemente pa drecha e situacion di hende muhe, nan yiunan y nan famia y pa trece e respet back pa cada individuo. FHMD ta hasi esaki door di, entre otro, duna informacion al caso na publico en general y na esnan cu ta acerca e fundacion, educa hende muhe, hende hombernan y hobennan ariba e topico di abuso domestico, duna guia na hende muhe pa yega na diferente instancianan cu por yuda nan, duna shelter na hende muhe y su yiunan ora nan ta victima di abuso domestico y asina hopi mas. E fundraising aki ta di suma importancia pa FHMD por keda haci nan trabou pa nos comunidad. Consecuentemente e fundacion ta spera cu e pueblo di Aruba lo sa di sostene e fundacion. 

FIESTA LUAU    

E fiesta ta den e tema di “Hawaiian Luau” y esaki lo keda refleha di cuminsamento te final di e anochi, for di e bunita decoracion tropical, pa e vestuario cu toke Luau, pa e cash “Tiki Bar” cu lo tin su signature tropical cocktails specialmente pa e Luau, te cu e “Hula Food Corner” cu lo tin platonan chiquito pa bende cu lo tin un toke tropical masha dushi mes y no lubida tambe e highlight di e anochi, cual lo bai ta un “Luau Roast Pig”, cu lo wordo haci na e fiesta mes riba candela, na estilo Hawaiiano. E lo ta un espectaculo riba su mes pa mira y purba, dus niun hende por perde esaki. Parti di e ganashi di e bar y cushina lo bai pa e fundacion tambe. Verder lo tin tambe suprise acts durante e anochi, un “Coco Loco Drink Spot”, photo op moments caminda hende por saca potret y muchu mas. Dus e lo ta un anochi diferente, exitante y fabuloso cu tur hende lo ta papiando di dje despues. Dus wak pa bo no keda afor! 

CARCHINAN

Carchinan pa e fiesta ya ta na benta y ta obtenibel cerca cada miembro di e directiva y tambe na Sero Blanco Service Station. Si mester special delivery di carchi na cas of na lugar di trabou, por yama FHMD na number 583-5400 of tambe e presidente, Sra. Suzy Kock na 593- 0330. Un carchi ta costa solamente USD 100 pa 2 persona, cual ta un super bon prijs pa un fiesta bailabel cu Tsunami y cu tur e ambiente tropical y tokenan special cu ta bai tin. 

VESTUARIO

E vestuario pa e anochi Luau, tin como dress code: Luau Casual Elegance. Sra. Bronswinkel a splica cu e dress code tropical no ta obligatorio, pero cu lo ta hopi great si por bin bisti cu un toke tropical. Esnan cu kier add un touch festivo y tropical seguramente por haña un bunita paña of accessorio na Trash by Ronchi, cu den e dianan siguiente lo bai post potretnan cu ideanan pa un vestuario ala Luau riba nan Facebook page. Fundacion tambe lo post ideanan riba nan Facebook page (fhmdd fundacion aruba), dus seguramente tur hende lo por wak algo cu lo inspira nan vestuario pa e anochi.