Training Cruz Cora Aruba durante weekend na Corsou

ORANJESTAD − E ultimo weekend Krus Korá Korsou a ricibi un total di 40 boluntario pa un training internacional hunto cu tur e OSB’s (Overseas Branches) di Cruz Cora y Het Nederlandse Rode Kruis. A participa 5 boluntario di Bonaire, Saba, St. Maarten, St. Eustatius, 10 di Corsou y 10 di Aruba. Meta di e training aki ta pa prepara pa e temporada di horcan y pa hunto por ta mas solidario cu otro y fuerte como organisacion humanitario. E training tabata posibel danki na Prinses Margriet Fonds di Het Nederlandse Rode Kruis.

CONTENIDO DI E TRAINING

E training a encera un table top exercise y un simulacion di un area di desaster den comunidad di Corsou caminda cu e boluntarionan di Cruz Cora mester a responde pa duna e ayudo necesario.

PAISNAN PARTICIPE

Mientras boluntarionan tabata den training, directivanan di Cruz Cora di cada isla y Hulanda a sinta hunto tambe y discuti hunto cu representante di International Federation of the Red Cross y UNHCR (United Nations High Commisoner for Refugees) topiconan manera migracion den region y e rol cu Cruz Cora lo por hunga den esaki.

CELEBRACION 85 AÑA

Tambe Krus Korá Korsou a celebra 85 aña dunando ayudo humanitario na Corsou y esaki a wordo celebra na final di e training. E recepcion aki a wordo atendi pa Gobernador di Corsou, Minister President di Corsou y tambe Sra. Inge Brakman, presidente di Het Nederlandse Rode Kruis.