Omar Tromp di Kvk: Minister Bermudez tin mas peso cu otro ministernan

ORANJESTAD – “Prome biaha den hopi tempo cu nos a sinta cu un minister cu sa di loke e ta papia” ta reaccion di presidente di Camara di Comercio Omar Tromp na NoticiaCla riba e reunion cu e tabatin hunto cu otro gremio y e mandatario. ‘E ta dunabo un tiki geruststelling”. Pero mes momento e ta bisa cu esey no kier men cu mester canta tur cos macamba pasobra mester actua prome. Ta duna e mandatario espacio y e tin cu traha. Pero e tin cu baha gasto di gobierno y ta dune un tempo cortico pa cuminsa corta gasto. Segun Tromp, debi na e experiencia hopi amplio cu Bermudez tin den finanzas, e ta compronde parti di comercio. “ E sa di kico e ta papiando di dje”. E tin mas peso cu e otro ministernan.

E mandatario a sinta hunto cu otro gremionan recientemente pa mira kico por haci riba varios asunto pendiente. Segun Tromp, a atende e atraso den pago y tambe e situacion di finanzas di gobierno. Aki e la tende di Bermudez pues cu tin intencion di paga e debenan atrasa cuminsando otro siman y cu lo cuminsa baha gasto tambe. E ta dispuesto pa duna e mandatario un tempo pa por ehecuta su plannan, pero lo vigil ‘e hopi di serca.