STA: Si no haya consensus cu Triple A awe, trahadonan lo bay den accion

ORANJESTAD - Si e reunion entre sindicato STA, mediado di gobierno y gerencia di aeropuerto (AAA NV) awe tardi no trece resultado, e trahadonan lo bay den accion. Asina presidente di e sindicato, Diego de Cuba a bisa NoticiaCla.com awe mainta laat. E trahadonan ta hopi rabia pa e forma cu e gerencia ta anda y no ta dispuesto pa tuma mas. Ta trata di un impasse formal cu e negociacion di CAO y e situacion por rementa un ora pa otro segun de Cuba. Si esey ta nifica accion awe mes, de Cuba no por a bisa. 

FALTA DI RESPET

Segun de Cuba, Triple A ta faltando un respet inmenso pa e sindicato STA y e empleadonan cu ta forma parti di e miembrecia. E problema segun e lider sindical ta cu Triple A 'ta pretende varios cos cu no ta cuadra cu realidad'. "Awor nan kier bisa cu nan ta dicidi den ki fondo di pensioen e trahadoann ta bay resulta" de Cuba a bisa. "Bij deze mi kier informa cu nan ta masha mal ekiboca y cu STA tambe". A bisa cu kier elimina e discriminacion riba fondo di pensioen. Tin un grupo grandi den APFA y e otro ta bou di Guardian, (cu STA ta considera un pensioen chiripero). "E cos di simberguensanan aki Triple A tin cu stop di haci y cuminsa actua drechi y netchi cu nos na mesa".

9 LUNA NEGOSHANDO

Ademas di esaki, tin 9 luna ta negoshando e contracto colectivo, unda cu entre otro e aumento general cu AAA NV ta dispuesto pa duna, segun STA, ta minimal. "Aworaki sorpresivamente nan kier bin duna un aumento general di 0.5% cu STA a bisa cu no ta acept'e. Categoricamente nos no ta acepta e humiyacion aki!" de Cuba a bisa. "Nos ta stop, kibra na mesa y nos a pidi intermediacion di mediado di gobierno awe tardi. Pero STA no ta descarta y ta pone Triple A completamente responsabel si mester surgi un accion riba aeropuerto pasobra ta nan ta e culpabel mayor cu e trahadonan actualmente ta masha mal disgusta mes y ta dispuesto pa pone trabou abou un ora pa otro" de Cuba a bisa. "Si awe tardi no tin consensus, ta bay tin accion" de Cuba a bisa. E reunion planea ta tuma lugar awer tardi 2'or.