Gobierno a pospone pago di reparatiepremie

ORANJESTAD – Contrario na palabracion acorda, e asina yama ‘reparatiepremie’ cu gobierno tin cu paga na trahadonan publico fin di augustus awor, ta wordo paga awor den e salario di september di e aña aki. Den un carta fecha augustus 7, 2014 (lesa e carta aki) e minister di finanza Angel Bermudez ta informa gobierno cu ta pa motibo ya conoci (aunke no ta bisa exactamente ki motibo), e proceso pa por paga e suma di AFL 850 florin, no por sigui e luna aki mas. “Asina cu e ley keda publica, e prima menciona lo wordo paga, pero no prome cu e salario di september” e carta di Bermudez ta sigui bisa.

E mandatario ta recorda cu ta trata di e acuerdo for di e reunion di indexering di 28 di mei 2014, unda cu a acorda cu hunto cu e acuerdo di pensioen, lo paga ambtenaarnan y nan corespondentenan, un asina yama ‘reparatiepremie’ di 850 florin. Den e mesun acuerdo aki ta para cu e mester wordo paga na augustus. E noticia aki pa hopi no a cay den bon tera ya cu tabata spera e suma di placa aki awor despues di vacation pa 'tapa buraco', y por a scucha tanto na radio como riba rednan social, cu algun ambtenaar a ventila nan disgusto, pero otronan a mustra nan comprension pa cu e situacion. Nan tin speransa cu otro luna si gobienro por cumpli cu e pago.