Dos dia prome cu e evento MusiCity, a pospone esaki

ORANJESTAD – Apenas un dia despues di a presenta nan line up oficial riba nan Facebook page, y dos dia prome cu e evento conoci como MusiCity tuma lugar, a keda posponi. “Debi na problemanan insolvable, rond di presentacion di e festival aki, nos a opta pa pospone e evento aki te november 27 pa 30 di e aña aki” e anuncio ta bisa. Fuera di esey, no a duna otro motibo pa e cancelacion di e evento. E intencion tabata pa tene e evento e fin di siman aki, cu un cantidad di mas di 60 banda programa, actividad y mas na altura di cas di Cultura y becindario.

 “Nos a haya un tremendo cantidad di sosten y amor di e comunidad pa cu e festival “ e anuncio ta sigui bisa. A gradici tur hende pa nan sosten, y a mustra cu lo tene esaki awor den e siman di ‘gracia’ conoci como Thanksgiving. E intencion ta pa e ora ey tene un cena di gracia cu un cantidad di famia Rubiano, cu ainda lo ta buscando pa cosnan pa ta agradecido na dje. E intencion di e organisacion aki tabata pa genera fondo di e evento aki y entrega e ganashi neto completamente na instancianan caritativo. Lo a uza henter e caminda rond di Cas di Cultura, y crea esaki den un ‘ciudad’ musical, estilo Calle 8 pero cu mucho mas evento cu solamente musica.