CASA CUNA TIN PROBLEMA

ORANJESTAD - Directora di Stichting Casa Cuna Progreso a informa su trahadornan cu e situacion financiero di e stichting ta alarmante y pesey a pidi cooperacion di tur trahador pa colabora pa reduci gastonan mas hopi cu ta posibel. Esaki teniendo na cuenta cu e salud y bienestar di e muchanan no mag di wordo afecta.

Pa varios aña Directiva di SCCP a constata cu e situaccion financiero di e stichting tabata empeorando progresivamente paso e stichting no tabata haya e placa cu Gobierno debe nan, segun contract.

Na juni aña 2000, exactamente 14 aña pasa, SCCP tabata den un situacion financiero critico, te asta cu Ministerraad a disidi cu Gobierno lo paga e fundacion loke nan debe cabalmente tur luna y na tempo. Lamentabelmente Gobierno no a mantene su mes completamente na e palabracionan y e debe a aumenta te na un suma actual di mas di AWG. 800.000,- (for di aña 2005 te awor).

Di su banda SCCP si a mantene su mes y lo sigui mantene su mes na palabracionan y percura cu cualkier mucha cu drenta SCCP di dia of anochi, haña lugar y wordo bon cuida. E fundacion ta wordo dirigi pa hendenan profesional cu ta dedica na nan trabou y cu semper lo sigui haci esey.

SCCP ta conciente cu tin un problema financiero na Aruba cu gobernantenan mester atende. Sinembargo e fundacion ta di opinion cu e muchanan di SCCP merece tur atencion y e prioridad y ta spera cu Gobierno lo sa di duna esaki su debido atencion.

SCCP ta dispuesto pa traha hunto cu gobierno pa mira con por yega na un debido solucion mas pronto cu ta posibel.