Lemaire: Interes pa hende local bira hues ta creciendo

ORANJESTAD - E hecho cu mayoria di huesnan na Aruba y resto di Caribe Hulandes ta procedente di Hulanda por wordo splica historicamente segun vice presidente di corte comun di Aruba Peter Lemaire na NoticiaCla.com. Durante un conferencia di prensa di Corte pa presentacion di e relato anual, Lemaire a mustra cu a dura un poco prome cu e generacion di studiante di Aruba, Corsou a haya interes den e funcion aki. "E ta un funcion dificil pa traha aden den un comunidad chikito" Lemaire a sigui splica. 

REKISITO PA BIRA HUEZ

Segun Lemaire, pa por ta un hues riba e islanan aki, tin su rekesito cu ta haci'e hopi biaha dificil pa por funciona como un hues. Entre e rekisitonan, bo mester ta independiente, distancia bo mes di cierto asuntonan cu bo por hayabo confronta cu ne. Entre otro bo por hayabo confronta den corte cu hendenan cu bo conoce. "Porta esey ta hunga un rol den e caso aki" Lemaire. Sinembargo pa tanto Aruba como Corsou, e no ta necesariamente un problema mas mirando cu tin un grupo hoben cu tin e interes necesario (pa por eherce e funcion di un hues). "E problema pues ta disminuyendo" Lemaire a caba bisa. 

CIRCULA COMO HUES

Compara cu Hulanda, esey ta un pais mas grandi y como tal tin mas circulacion (di hues). Ey bo por specialisa den cierto tipo di ley, mientras cu aki esey ta mas dificil. Lemaire a splica cu na Hulanda cada pasa tempo un hues por circula di tereno di ley. Aki esey ta mucho mas dificil. "Aruba tin un total di 9 hues, y esnan cu ta local lo mas sigur keda (biba) aki tambe. Esey no ta mucho deseabel pasobra ta bon pa de bes en cuando tin sanger nobo" Lemaire a sigui splica. Por logra resolve e problema ey door di circula entre e islanan di Caribe Hulandes, pero ta bon tambe pa tin un relacion cu Hulanda, unda cu un hues local por circula tambe na Hulanda, y huesnan di Hulanda circula na Aruba pa haya e sentimento di e desaroyo nobo. Actualmente tin un grupo di solamente hende local cu ta siguiendo e curso di hues, cu sigur ta algo positivo segun Lemaire.