Hues De Werd: Cu Panama Papers mester tene cuenta cu dos faceta

ORANJESTAD - Mientras cu como hues, ta dificil pa duna comentario riba e asunto di e afamado 'Panama Papers', hues Mari de Werd a splica kico e facetanan ta den e caso aki pa tene cuenta cu ne. De Werd ta un hues experto riba tereno di impuesto, y ta na Aruba pa crea e departamento di 'derecho di impuesto' na Aruba pa corte di husticia. Segun de Werd, tin dos faceta cu ta 'belasting ontduiking' evasion di impuesto, cu segun de Werd ta obhetabel, y tin e faceta di 'belasting ontwijking' unda cu hende ta busca forma 'legal' pa evita cu nan tin cu paga belasting uzando cierto ley na nan fabor. "Esey por tuma lugar den margen di ley" de Werd a sigui bisa. Ta keda na e hues di impuesto pa dicidi si e persona a haci uzo corecto di e ley. "Bo por argumenta cu bo ta uza e ley di e manera specifico, pero e pregunta ta si esey ta responsabel ainda', de Werd a bisa. 

PANAMA PAPERS Y ARUBA

Segun e documentonan conoci como 'Panama Papers', tin un total di 19 adres cu ta aparece den e documentonan ey, 4 entidad y 5 'officers'. E ta un variedad di por lo menos 10 adres unda cu por lo menos un di nan ta ripiti como 5 biaha, osea tin 5 instancia registra na e mesun adres. No ta conoci si pasobra nan ta registra riba Panama Papers, si automaticamente nan a comete algo ilegal of no. Tin compania cu ta completamente legal, mientras cu otronan por a purba. 'Un total di 19 adres na Aruba, 4 entidad y 5 'officers' a keda revela dialuna atardi, cu ta aparece riba e asina yama 'Panama Papers'. Varios di nan ta adresnan unda cu e companianan ta registra, pero hopi di nan no ta di Aruba mes. Den e proximo ratonan lo tin mas informacion riba e caso aki y kico tur e nombernan ta nifica. 

REVELO ANUNCIA

Manera anuncia dia 9 di mei ultimo un grupo di periodista internacional lo a revela e contenido di e asina yama 'Panama Papers',- miles di documento conteniendo informacion confidencial di comerciante, gobernante y otro personanan cu a uza e bufete Panameño pa 'sconde' informacion crucial. E loke ta haci esaki interesante ta e hecho cu Aruba su nomber tambe ta wordo menciona y por sali afo kennan tur a 'presta nan mes na e practica di sconde informacion crucial financiero'. Mientras cu no necesariamente tin hendenan cu a haci cosnan 'ilegal', gran parti di e documentonan lo revela netamente esnan cu posiblemente si a uza formanan 'legal' pa sconde placa adkeri 'ilegal' of a uza metodo pa evadi impuesto. 

INFORMACION A 'LEK'

Luna pasa un grupo di periodista a lek e informacion cu lo 'lek' miles di documento riba un fecha mas leu den aña, y cu esaki probablemente lo ta na mei. A resulta cu e fecha exacto ta 9 di mei, dialuna awor pa 2'or di atardi (ora di Aruba). E ora ey, lo bira conoci kennan tur (di Aruba tambe) ta 'envolvi' den Panama Papers. Si nan ta legal of ilegal, tin cu wordo determina ainda. 

RELEVANTE PA ARUBA

Loke ta haci e caso aki relevante pues, ta cu pa Aruba tambe e caso aki ta conta, unda cu NoticiaCla.com a compronde cu un total di 27 compania ta aparece riba e lista, 3 cliente y 30 accionista. Pregunta grandi ta cua ta e companianan cu ta aparece riba e lista aki y kico tur lo por keda divulga di e companianan, e clientenan y e accionistanan. Mas ainda, si ta trata tambe di politiconan posiblemente. Corsou tambe no a scapa y ta mustra cu pa e isla bisiña, tin como 30 compania cu ta aparece riba e lista, 2 cliente y 11 beneficiario y 95 accionista di cual informacion ta plama. Atrobe, no ta conoci y no por a verifica ainda ki tipo di informacion ta plama di Aruba y Corsou y si enberdad esaki por ta 'peligroso' pa e respectivo persona y of companianan envolvi. NoticiaCla.com su investigacion ta sigui riba e caso aki. Loke por bisa awor, cu Wikileaks mes, a publica un mapa mundial di tur e paisnan cu ta involucra, y aki por mira con Aruba y Corsou tambe ta implica. 

REPERCUSION PA CLIENTENAN NA ARUBA

Si resulta cu clientenan Arubano di e bufete di abogado Panameño  Mossack Fonseca a sconde placa pa evadi impuesto, lo actua fuertemente contra nan door di departamento di impuesto. Asina minister di finanza Angel Bermudez a bisa como reaccion riba e leak di e asina yama 'Panama Papers' luna pasa.  "Si en caso esaki sosode pa evadi pago di impuesto, lo actua fuerte contra e discubrimento di esaki a base di cobransa retroactivo y multa halto. Si ta necesario, lo tin persecusion penal tambe" e mandatario a sigui bisa.   

REACCION MINISTERIO PUBLICO

Ministerio Publico no tabata conoci (ainda)  cu sospechonan concreto cu un interes Arubiano. Nan a referi na e caso di Panama Papers y Aruba su posibel envolvimento. Asina su vocero Ann Angela a reacciona luna pasa pa NoticiaCla.com. Esey ta no obstante cu ta conoci cu tin tres cliente, varios compania y accionista di Aruba registra riba e documentonan internacional.  Segun Angela, " Ministerio Publico tambe a tuma nota di publicacion di e Panama Papers" Angela a sigui bisa. El a mustra tambe cu 'generalmente Ministerio Publico ta persigui casonan di labamento di placa'.