Accion na refineria Isla ta continua y Curoil cu problema pa suministra gasolin

WILLEMSTAD - E accion di trahadonan di refineria Isla (PDVSA) ta continua diaranson anochi te proximo aviso, cu ta nifica cu lo sigui blokea entrada di e refineria. For di mainta e accion a cuminsa pa motibo cu kier claridad riba e structura cu gobierno kier trece den e asunto separando Bullenbaai for di Isla, siendo cu segun presidentenan di e sindicatonan PWFC y APRI no por. A invita e sindicatonan pa un reunion diabierna pero e sindicatonan kier pa e reunion tuma lugar mesora. Mientrastanto nan ta keda den accion. A desmenti tambe cu nan accion lo ta obstaculisando e suministro di gasolin pa CurOil pa e pompnan di gasolin. Di otro banda Curoil a reacciona, confirmando e problema di suministro. 

ACCION TA OPSTRUI TRABOU DI CUROIL

Segun Curoil su trabou a keda obstrui di tal forma cu Curoil y Curgas su trucknan cu na prome instante a logra sali for di tereno di Refineria Isla no por a drenta bek riba tereno di Refineria Isla pa recarga producto y bolbe sali pa continua cu distribucion.

Si e situacion aki continua, Curoil ni Curgas, no por suministra su clientenan manera debe ser, pues entrega ta keda afecta considerablemente. Consequentemente diferente pomp di gasolin no por risibi e cantidad di combustibel cu nan a pidi. Ademas entrega di gas domestico y comercial tanto na Corsou como na Boneiro lo keda afecta. Curoil tin sufisiente reserva di combustibel pa tur pomp di gasolin, gas pa uzo domestico y comercial, jetfuel pa avion y bunkering tanto pa Corsou como Boneiro.

Pa distribucion di producto local, mientras tur almasenahe di producto lokal ta riba tereno di Refineria Isla, Curoil ta dependiente di otro partido pa risibi acceso na e tankinanan cual ta ubica riba tereno di Refineria Isla pa por haci e distribucion di un forma responsabel y salbaguardiando seguridad di su personal y su ekipo. 

Curoil ta lamenta cu su tarea di distribucion di combustibel y gas ta keda obstrui. Di Curoil su parti lo trata incansablemente pa cumpli cu entrega di producto teniendo na cuenta seguridad di personal di Curoil y Curgas, sperando cu partidonan lo sa di yega na un entendimento.