Alerta pa mensahe di SMS falso circulando na Aruba

ORANJESTAD - Un biaha mas hendenan na Aruba a haya nan mes den un situacion fastioso awe ora cu nan a 'cay' den trampa via un mensahe falso cu a resulta di ta un virus. Algun tempo atras NoticiaCla.com a alerta caba riba esaki. Awe SETAR a bolbe emiti un alerta pa un 'scam' nobo cu ta circulando awe. Si bo a ricibi un SMS cu tin bo nomber y “bel me +44 7006119821 dringende” no yam’e bek y delete e mesora. No forward e tampoco pa ningun hende.

MENSAHE FALSO

Tin varios usuario di celular e dianan aki cu ta ricibi e mensahe falso aki cu no ta bin di un país of paisnan den exterior. Cualkier number cu ta cuminsa cu 4470 ta un scam sigur!  Si bo ricibi cualkier mensahe di un number cu bo no ta reconoce, no yam’e bek ni forward e pa ningun otro hende. E por costa bo placa.

COUNTRY CODE

E country code, (+44) ta indica numbernan cu ta normal di UK (United Kingdom).  E 70 cu ta sigui, ta indica un number personal pa forward. Scammers ta gusta uza e sistema aki di tin un number portabel cu tin un number cu ta parce di ta basa na London, pero no ta.

NUMBER DI ABOGADO

Hopi biaha e number ta pretende di ta di un oficina di abogado, travel agent, loteria of oficina na London. E scam aki por bin den forma di e-mail tambe, pues tene hopi atencion na mensahenan cu ta pidi pa yama bek un number no conoci. Scammers ta gusta uza e numbernan aki paso nan ta pretende di ta comunica via London siendo por ehempel nan ta na Nigeria. Nan ta pidi pa stort placa of si bo yama bek of bay riba e site e por costa bo gastonan grandi riba bo cobransa.

NO HABRI NINGUN LINK DESCONOCI!

Por ultimo ta subraya na e publico en general pa no habri ningun link, site of number desconoci ni riba celular, computer  of otro device. Tampoco instala appnan cu bo no sa nan origen y check si nan ta berdaderamente e appnan cu bo kier a download.