VVD: Preocupa pa posibel caso di refugiado di Venezuela pa Aruba

DEN HAAG - Contrario na pensamentonan na Aruba, Hulanda debidamente ta preocupa cu e situacion na Venezuela y e implicacion cu e por tin pa Aruba. Por lo menos un fraccion ta preocupa. Lider di fraccion di VVD den Tweede Kamer Andre Bosman a confirma pa NoticiaCla.com cu su partido ta preocupa pa un tempo caba. "Nos ta mira cu e problemanan ta grandi y cu e risiconan di posibel casonan di refugiado pa Aruba ta grandi. Como tal a haci pregunta (un tempo atras) na gabinete Rutte, cu na nan turno e tempo ey a contesta cu 'nan ta den contacto cu gabinete di Mike Eman" Bosman a bisa. "Pero nos ta sigui ta preocupa."

PREGUNTA PA GABINETE RUTTE

Mirando cu e situacion ta birando explosivo na Venezuela, y cu no a tende nada mas, VVD a haci preguntanan 'oral' na e mandatarionan, pero no a haya contesta. Como tal a dicidi di manda pregunta por escrito unda cu ta raporta cu e.o. Venezuela a anuncia un situacion di emergencia, y cu tin mas y mas derecho a wordo kita di e Venezolanonan, cu ta yuda aumenta e intrankilidad di e habitantenan. VVD kier sa riba e tema aki kico su gabinete ta pensa di e asunto aki. 

REACCION RIBA VISA 'CONDICIONA'

E parlamentario Hulandes a confirma di a tuma nota di e peticion di e mandatario di turismo di Aruba Otmar Oduber pa un visa condiciona pa Venezolanonan. "E ta zona como un opcion hopi corecto" Bosman a bisa na prome instante. Solamente cu mester tene cuenta cu e hendenan problematico no ta bin necesariamente via avion sino tambe via boto. "E ora e pregunta mester ta si un visa lo por frena e influx di hendenan cu ta drenta Aruba asina" Bosman a sigui bisa. E parlamentario sinembargo ta positivo riba e idea. "Mi ta hopi interesa pa tende kico e posibilidadnan ta, kico e opcionan pa yega na un visa pa Venezolanonan" Bosman a finalisa bisando.