Henriquez: Resultado reunion awe ta determina si caso sumario ta sigui

ORANJESTAD - Te cu awe mainta ainda e caso sumario cu ATIA kier a entama contra sindicato SADA, tabata vigente. Asina e presidente di e gremio comercial esta Michel Henriquez a confirma na NoticiaCla.com awe mainta. Tin un reunion awe mainta entre directie scheepvaart comissie cu tur stakeholders ta hinca aden, unda cu mester a delibera ariba pa bin na un desicion. E desicion ey ta determinante pa wak si e caso ta continua of no. E reunion a cuminsa mainta y mester termina pa merdia. Esey ta nifica cu si e reunion caba merdia den un forma negativo, e caso ta continua segun Henriquez. 

EVITA CASO DEN CORTE

Mes momento Henriquez ta mustra si cu nan kier evita un caso den corte y ta uzando esaki como e ultimo recurso. Loke nan kier ta un claridad riba e caso aki, sin cu nan ta tuma parti pa partido. Den mesun rosea sinembargo Henriquez ta mustra cu tanten cu no tin un claridad, ta keda e incertidumbre cu por nifica otro paro entre otro grupo cu na final ta perhudica comercio atrobe. Ta importante pa e reunion di awe bay bon pa e caso no sigui. "Sino un hende tin cu tuma un desicion" Henriquez ta bisa, refiriendo na e hues. 

DAÑO CAUSA NA COMERCIO

A mustra cu mientras cu ta conoci cu tabatin daño sufri pa comercio, e embergadura no ta conoci ainda. "Ta hopi negoshi a wordo perhudica y hopi trabou a wordo perhudica tambe" Henriquez a bisa. Ta calculando e daño exacto. Companianan ta asimilando e daño y ta determina e ora despues kico ta e siguiente paso. Esta cu si ta entama un otro caso (di daño y perhuicio) of ki otro tipo di paso por tuma.