ATIA: Dividi riba con pa frena all-inclusive pero uni cu mester frena esaki si

ORANJESTAD - Mientras cu ATIA a sali basta satisfecho for di reunion, e no ta kita afo cu ainda nan tin preocupacion. Asina e presidente di e gremio Michel Henriquez a bisa NoticiaCla.com awe mainta. Gobierno a manda su propio comunicado di e reunion indicando cu ATIA tabata masha satisfecho. Berdad, segun Henriquez pero no totalmente convenci. "Ainda nos tin pregunta y concern y nos tin cu sigui informa nos mes riba e topico aki" Henriquez a sigura e portal aki. 

ACUERDO CU MINISTER  AÑA PASA

A mustra cu aña pasa ATIA tabata di acuerdo cu minister Oduber riba e caso di Hilton unda cu un expansion di all inclusive riba e strip no ta na miho interes di e pais. Eynan nan tabata di acuerdo con e mandatario a atende cu e asunto e tempo ey. Den e caso aki, mirando cu ATIA tin un variacion di cliente, su interes ta mas grandi y eynan tin cu mira tur e posicionan posibel. Como tal e board di ATIA ta dividi riba e asunto di ley di all inclusive con pa frena esaki. Sinembargo, loke si nan tin acuerdo, ta cu mester para e crecemento di all inclusive, pasobra esaki ta negativo pa e negoshinan den besindario. 

DIVIDI CON PA REGLA E ASUNTO

Loke no a sali afo ainda ta e manera con ta proponiendo pa regla e asunto. "Nos ta kere cu prome cu tuma un desicion, mester studia tur alternativa y lo ta ideal pa tur partido bay na mesa pa yega na otro den un compromiso" Henriquez ta bisa. E problema cu AHATA tin cu e ley ta frustra e intento di posibel inversionista pa nos isla, a keda scucha tambe pa ATIA. "Nos a trece esey na minister, y el a bisa nos cu no tin mucho alternativa riba esey y cu si no haciele, e realidad ta e ora varios propriedad lo converti nan mes den all inclusive." E pregunta di ATIA ta si tin otro forma pa atende e asunto aki. "Nos mes no ta completamente convenci riba e tema ainda y ta buscando mas informacion sin cu tin cu mete cu vergunning di un hotel of negoshi den otro area." E ta un tema polemico segun Henriquez y mester busca un bon solucion p'e situacion.