Schwengle: Si no uza edificio di IMSAN, e lo nifica 'destruccion di inversion'

ORANJESTAD - E edificio di IMSan a wordo construi como un centro di cuido y lo sigui wordo uza tambe como tal. Asina e mandatario di salud Alex Schwengle a bisa recientemente ora cu a presenta e plannan completo pa e centro aki. De hecho, segun e mandatario, si no haci'e, e lo nifica “kapitaalvernietiging”, esta “destruccion di inversion” si no sigui cu e plannan. Sinembargo den mesun rosea, e mandatario ta cuestiona e fayonan den e infrastructura cometi. Cosnan cu segun e mandatario, a sosode den e gabinete anterior. 

EXPLOITATIEKOSTEN

E departamento cu mas ta bay costa na “exploitatiekosten” ta e salanan di operacion; lo tuma un inversion di entre shete pa nuebe miyon florin pa tur cos keda cla. E mandatario a sigui mustra cu e realidad ta cu Aruba mester di mas sala di operacion, y esunnan di IMSan lo complementa esunnan di hospital y asina lo corta tambe e tempo cu pashentnan mester warda pa haya un operacion of intervencion. E comunicaion entre IMSan y Hospitaal tabata hopi importante pa por realisa un bon plan y bon partnership. " Ta logico pa caba loke a cuminsa cu ne, como cu ya tur cos ta den un fase bastante avansa", segun Minister Schwengle.  

IMPACTO CU CITGO TIN

E hecho cu tin posibilidad cu CITGO por bin Aruba, ta pone cu mester tene cuenta cu esaki tambe. Segun e mandatario, den futuro lo mester bin combersacion tambe entre IMSan y Citgo pa determina e servicionan cu Citgo lo mester y kico IMSan por provee of kico lo por haci pa adapta cierto servicionan pa acomoda e necesidadnan di Citgo, e minister a comenta.

NECESIDAD PA CENTRO MEDICO

Tin un necesidad pa un centro medico na San Nicolas y cu e acuerdo cu a yega entre e partidonan envolvi awo por sigui traha riba su realisacion. A inverti hopi caba aki, banda di infrastructura tambe den aparatonan cu ainda no ta den uzo, y lo ta pica pa no caba e trabao.

FAYONAN COMETI DEN INFRASTRUCTURA

E mandatario a referi tambe na e fayonan cu a wordo cometi den e infrastructura di e edificio. Apesar cu tabatin algun fout den e infrastructura, manera e escogencia di lift, cual ta mucho chikito pa transporta brancard, y e falta di cumplimento cu “brandveiligheid”, pa falta di bon planificacion, lo haci e cambionan necesario y lo sigui cu e plannan nobo y adapta pa ofrece mas servicio y calidad halto di cuido cu lo bay conta cu acreditacion internacional di JCI, Minister Schwengle a remarca.