Argus: Ehecutivonan di CITGO ta cuestiona deal pa lease refineria

ORANJESTAD/HOUSTON — E deal biyonario anuncia recientemente entre CITGO y gobierno di Aruba ta uno hopi comenta desde cu gobierno a anuncia esaki cu hopi fanfaria. Pero e hecho cu no tabatin ningun firmamento sino solamente 'un anuncio di un acuerdo', a laga hopi comentando riba e embergadura di esaki . E agencia Britanico di noticia Argus a te hasta yama e deal uno  'controversial' diamars den un comunicado internacional. Esaki nan ta bisa basa riba e informacion cu nan a logra compila. Localmente mientras cu esnan liga na gobierno a celebra y ta contento cu e deal, otronan mas 'critico', ta cuestiona e deal, mirando cu no por compronde con bin a haci tanto fanfaria pa un deal cu ainda no ta firma.

COBERTURA INTERNACIONAL Y LOCAL

Den fin di siman for di seno di gobierno a sali un cantidad di publicacion riba e tema, cubriendo practicamente tur angulo di e deal aki. Hunto cu ne a manda esaki tambe pa rednan di prensa internacional cu a publica e comunicado di e 'acuerdo' aki. Pero contrario na agencianan cu a opta pa publica e comunicado di e acuerdo sin mas esta manera cu nan a ricibi'e, Argus a analisa e deal cu entre otro fuentenan dentro di Citgo mes. E unico parti cu Argus ta cita, ta e palabranan 'e deal ta completamente formalisa' di minister Mike de Meza. 

E DEAL

Segun Argus, oficialmente ni Citgo ni PDVSA a comenta formalmente riba e acuerdo. Nan ta mustra cu logisticamente mira, e deal ta ofrece e compania Venezolano PDVSA 'un otro sitio potencial pa un operacion logistico, produccion di Naphtha y posibel mescla crudo diluido di e faha di Orinoco cu tin petrolio hopi pisa. E resultado lo wordo exporta pa e mercado Asiatico Pacifico, primordialmente China. Segun Argus, PDVSA a uza CITGO pa haya e lease pasobra e mes lo no tin capital of credito pa ehecuta e deal su so. 

RABIA ENTRE EHECUTIVONAN CITGO NO - VENEZOLANO

E deal a crea rabia entre ehecutivonan no Venezolano cu lo a conta Argus cu e deal a wordo crea tras di nan lomba y 'ta afecta e estado financiero di e compania'. "E tabata un asunto completamente regla pa e Venezolanonan, y e termino y condicionan no ta transparente, a lo minimo" un ehecutivo cu no tabata parti di e negociacion a bisa Argus. Esaki riba su mes ta interesante mirando cu e deal a wordo construi cu ehecutivonan di CITGO na Merca. Sinembargo debi na falta di transparencia, no ta conoci si e oficialnan (fuera di e director) ta Mericano of Venezolano. 

APROBACION DI VENEZUELA

E agencia ta mustra cu basa riba e informacion cu e tin, e acuerdo cera entre CITGO y Aruba lo crea un cadena di reaccion di oposicion Venezolano cu ta controla e asamblea nacional, pasobra e deal a wordo cera sin aprobacion legislativo, y PDVSA ta un compania di estado. Mescos e deal mester wordo aproba pa parlamento di Aruba. "Esey lo tuma lugar den cuestion di dias" un persona den e team di negociacion lo a declara. Na Aruba ora cu prensa local a puntra e mandatario di energia na momento di e anuncio diabierna si tin fecha di firmamento caba, y si ta dias, siman, luna y e lugar di firmamento, e mandatario tabata hopi vago y no a duna algo concreto. "Pronto" e mandatario a bisa. Loke tabata interesante ta e hecho cu e mandatario a indica cu e firmamento por tabata na Aruba, Venezuela of Merca.  

INFORMACION CONTRADICTORIO

Mientras cu Argus ta raporta cu lo por tin problema den oposicion pa cu e deal aki, NoticiaCla.com a raporta for di siman pasa cu e situacion por ta net contrario, unda cu gobierno Venezolano lo a exigi pa prome cu tin cualkier firmamento, prome minister Mike Eman mester bishita presidente Venezolano Nicolas Maduro y splica e situacion y intencion di Aruba. Ora cu a confronta e persona encarga cu e negociacion pa Aruba un dia prome cu a anuncia e deal, esaki a bisa cu esey no ta probabel mirando cu e no ta un deal politico. Pues un biahe pa Venezuela lo no tin sentido y a practicamente desmenti e noticia. Sinembargo, cu e hecho cu no a firma nada diabierna, a pone hopi pensa bek riba e asunto anterior, esta cu no a firma pasobra mester haya aprobacion di gobierno Venezolano. Di otro banda ta conoci (y Argus tambe ta relata esey) cu prome cu e deal por sigui, mester tin aprobacion di parlamento di Aruba aunke ta kere cu esaki ta meramente un formalidad mirando cu e fraccion ta sostene e deal y a vocifera esaki pa medio di varios comunicado. Hecho ta, cu ainda no tin ningun deal firma, y cu no tin un fecha pa esaki tuma lugar. Y tanten cu no tin un deal firma, no por papia di un acuerdo legal, aunke fuentenan a bisa cu e deal ta asina sigur cu ta cuestion di formalidad pa firma e deal y cu esaki ta un 'done deal', y cu dificilmente despues di un anuncio 'conhunto', partidonan por hala atras.