Zissu Properties lo haya su permiso adapta pa habri hotel

ORANJESTAD - Si tur cos ta bon, e siman aki gobierno tin cu regla e documentacion pa keda cla cu e permiso hotelero pa Zissu Properties NV por cuminsa opera Ocean Z boutique hotel. Minister di salud Alex Schwengle a confirma na NoticiaCla.com cu el a tuma nota di e sentencia di siman pasa unda cu hues a probibi Preserva Malmok pa impone multa riba gobierno. Esey tabata e ultimo barera cu tabata wanta e mandatario pa duna e permiso. "Si ta berdad, manera mi a tende cu segun e vonnis, e ultimo drempel a wordo kita, e ora Ocean Z lo haya un 'aangepaste hotelvergunning'" Schwengle a bisa. Esaki pasobra e permiso mester ta adapta segun reglanan nobo. De hecho, Ocean Z lo bira e prome hotel cu ta cumpli cu e reglanan nobo aki. 

MESTER ANCRA MANEHO NOBO DEN LEY

Segun Schwengle, aworaki bo tin riba henter e 'strook' na Malmok cu hala di cas a wordo converti den un negoshi, aunke chikito, estilo bed & breakfast. "No mas cu e no ta ancra ainda den regla y maneho. A bira tempo pa haci esey awor. Como tal e (Ocean Z) ta haya un permiso adapta cu ta dun'e e permiso pa opera un hotel estilo 'bed & breakfast". Pa loke ta e tempo mara na esaki, e mandatario ta kere cu den 'maximaal dos siman' e mester ta cla. "Esaki pasobra mi mester laga nan 'herschrijf' un paar di cos" e mandatario a finalisa bisando. 

CASO Y SENTENCIA

Manera ta conoci, siman pasa tabatin un caso y un sentencia mesora riba e tema, unda cu gobierno a pidi hues pa prohibi e grupo di habitante bou di e nomber Preserva Malmok, pa impone un multa segun sentencia di 13 di januari 2016 contra gobierno. E multa tabata poni en caso gobierno viola e sentencia di hues (cambia destinacion di e propiedad riba of despues di sentencia di hues), locual a resulta den e caso siman pasa, di no ta e caso.