Manifiesto di taxistanan contra aumento 'all-inclusive' entrega na minister

ORANJESTAD - Un grupo di taxista a entrega un manifiesto na minister di turismo Otmar Oduber dialuna mainta cu firma di 255 taxista contra mas camber di e tipo di acomodacion All-inclusive. Durante reunion cu Oduber, e taxistanan a comparti cu nan sigur a sinti e impacto negativo di e tendencia aki. E mandatario a mustra cu no ta taxistanan so a vocifera nan preocupacion.

MAS GRUPO PRECUPA

E mandatario ta comparti cu durante e siman tras di lomba el a ricibi un gran cantidad di cartanan di diferente asociacionnan na Aruba, entre otro di 'wholesalers' proveedornan, importadornan di producto pa nos isla, por lo menos 4 compania di e tipo aki, doño di hotelnan, asociacion di restaurantnan tanto Aruba Gastronomic Association como  tambe un gran cantidad di restaurantnan cu no ta asocia cu A.G.A. pero cu ta situa den e area turistico tambe a dirigi carta pa e mandatario. Asina ta mira un cantidad grandi di gruponan den nos comunidad cu ta preocupa cu e fenomeno di All-inclusive.

LEY NA PARLAMENTO

E ley riba e cambio di all-inclusive ya caba ta na Parlamento y tin varios reunionnan tumando luga cu e diferente comisionnan di Parlamento unda cu pa inicio di juni preguntanan lo bin Gobierno, pa na nan turno keda contesta pa asina e por keda trata den Parlamento. Oduber ta spera di por trata e ley aki prome cu reces.