Consensus logra pa sigui cu desaroyo di servicio na IMSAN

ORANJESTAD - Despues di hopi analisis y negociacion, AZV, gobierno y IMSan a yega na e punto cu por anuncia na comunidad di Aruba cu a yega na un consensus pa cu a desaroyo di servicionan na IMSan cu ta complementa e servicionan y cuido cu ta wordo brinda na Dr. Horacio E. Oduber Hospital.

INVERSIONAN HACI CABA

Hopi miyones a wordo inverti caba na IMSan y no tin ningun logica pa no sigui cu loke a cuminsa caba, haciendo cambio, adaptacionnan y agregando na e servicionan y ekiponan cu ya tin aki, e minister a expresa. El a agrega cu ta tene na cuenta sigur tambe cu expansion di servicionan e convinencia y comodidad di e habitantenan di pariba di brug, kende lo corta tempo di biahe y espera uzando servicionan cu lo ta disponibel na San Nicolas tambe.

PROME PASHENT RADIOTERAPIA

Pa 2018 IMSan, hunto cu su partner internacional Baptist Health South Florida mester ta cla pa ricibi su prome pashent pa radioterapia, cual ta wordo administra cu un linear accelerator hopi moderno, y lo por cuminsa uza e tres salanan di operacion. E salanan di operacion lo ta dedica na “dagbehandelingen”, o sea intervencionnan pa cual e pashent no ta wordo admiti den hospital. Si acaso pasa cu un pashent mester wordo admiti, e ta wordo manda hospital. Pa cumpli cu rekisitonan pa e servicio di radioterapia, lo expande tambe e departamento di “rontgen”. Lo agrega por lo menos un servicio mas, esta di CT-scan.

DESAROYO SPECIALISTA DI WOWO

Como cu IMSan lo sigui desaroya e departamento di specialista di wowo, un di e salanan di operacion ta bira practicamente exclusivamente pa operacionnan di wowo. Adicional di e 18 stoelnan cu ya ta den uzo completo pa haemodialyse, ta agregando servicionan di peritoneale dialyse; y e departamento di eerste hulp lo conoce expansion y profesionalisacion. E parti di sterilisacion cu ta pertenece na e salanan di operacion ta casi cla, Minister Schwengle a agrega.