Aruba Bank a anuncia nan Walk & Run 2016 cu rutanan nobo

ORANJESTAD - Aruba Bank dialuna a anuncia nan proximo caminata y coremento, conoci como nan evento di “Walk & Run”, riba dianan diamars 31 di mei, y sigui diaranson 1 di juni, diahuebs 2 di juni y ta culmina diabierna dia 3 di juni 2016 den 4 diferente districto. E slogan di e aña aki ta “Always Forward”.

RUTA NOBO

Aruba Bank e aña aki ta introduci 2 ruta nobo. E prome dia lo sali y termina na e Aruba Bank Drive Thru Center na Paradera, e biaha aki lo tuma un otro ruta y e di 2 dia lo sali y termina na Fisherman's Huts, cual tambe ta un ruta nobo e aña aki.

REGISTRACION

Registracion ta habri desde dialuna 16 di mei via walk-and-run@arubabank.com. Registracion ta individual. Bo por registra pa cana, pa coredo of cana/core (indicando cu bo ta core pero mas tanto pa train y recrea, no necesariamente pa competi).Ta conseha tur hende pa asina registra, paga mesora, pa asina garantisa bo luga. E aña aki por paga online via Aruba Bank Online (ABO), uzando e feature di “Bill Payment” den e drop-down, por scoge “Aruba Bank Walk & Run 2016". Esaki ta solamente pa clientenan di Aruba Bank. Otro participantenan cu no tin ABO, por paga na IBISA su oficia na Frankrijkstraat of San Nicolas, uzando e machin di swipe di Aruba Bank, of por paga cu cash. Inscripcion y partimento di size di shirts ta bay a base di “first come first serve”. Tur participante ta ricibi 1 dri-fit shirt, un visor (pechi) y un chip. Ta corda tur hende pa registra na tempo pa evita cu na ultimo momento ta busca luga pa participa, ora cu tur cupo ta yen caba. Lo tin premio CASH pa coredo, top 5 femenino y top 5 masculino. Tambe e top 3 den cada categoria lo ricibi un medaya.