AAA NV. trahando di cerca cu desaroyadonan di hotel pa aeropuerto

ORANJESTAD - Cualkier indicacion cu aeropuerto di Aruba ta contra e binimento di un airport hotel, a keda desbarata awe. Pa medio di un comunicado, Aruba Airport Authority N.V. (AAA) a confirma publicamente cu nan ta trahando di cerca cu desaroyadornan di hotel riba un facilidad plania pa un area habri na e parti pariba di aeropuerto cu ta wordo spera di keda cla den aproximadamente 2 aña.  

PLANIFICACION 

Segun e comunicado, 'e planificacion y discusionnan entre AAA y e propietarionan di e hotel a cuminsa di trempan caba pa sigura cu e facilidadnan nobo lo ta bon pa e hotel y pa aeropuerto': “Nos ta kere cu e desaroyo di e tereno pega cu aeropuerto pa un hotel nobo ta un bon proposicion di negoshi, y nos ta kere cu un facilidad asina lo sigui mehora e experiencia di e pasahero cu ta haci uzo di nos aeropuerto” asina CEO di AAA Sr. James Fazio a bisa.

MAS REUNION

AAA a mustra cu nan ta spera di por sigui reuni cu e desaroyadornan pa por traha di cerca riba por ehempel concepto di diseño, desaroyo di e negoshi, e cambionan pa trafico, seguridad di avionnan y polisanan di trafico pa yega aeropuerto. E desaroyadornan ta plania pa ofrece servicio- y facilidadnan adicional manera espacio pa oficina comercial, espacio pa reunion y tene conferencia, como tambe opcionnan pa come y bebe y otro posibel servicionan pa complimenta e facilidadnan existente na aeropuerto. E discusionnan habri entre aeropuerto y e desaroyador di hotel ta enfoca pa defini e servicionan aki, protehando e inversionnan financiero di aeropuerto y formanan di genera entrada, y identifica servicionan cu ta duna mas balor pa tanto aeropuerto y e hotel. “Nos ta hopi contento cu e coperacion y animo di tur envolvi pa traha hunto riba e proyecto aki. E colaboracion pa planifica asina trempan lo tin un impacto positivo riba e exito di e facilidadnan nobo di e hotel” segun CEO di AAA.