Bogaerts su bateo cu Boston Red Sox ta sigui impresiona

BOSTON - E pelotero profesional di Aruba Xander Bogaerts, conoci awor como 'The X-Man' un biaha mas a yena su isla cu orguyo, cu su prestacion increibel den e ultimo weganan. Militando pa e ekipo di Boston Red Sox, su bateo y fildeo ta sigui hopi 'cayente'. Diadomingo un biaha mas el a mustra su poder ora cu el a dal su di 4 homerun (su di 2 den 7 wega), empuhando tres careda. E weekend aki el a dal hit tambe entre nan un doblete. Y su hugadanan defensivo tambe ta 'cayente'. Te cu algun dia pasa, Boston tabata na cabes di su division, pero a cera e siman cu 24 wega gana y 14 perdi, ganando su ultimo dos weganan. 

ESTADISTICA DI XANDER BOGAERTS

Actualmente Bogaerts ta lidera su ekipo den average cu .338 di promedio y tambe den e cantidad di hits, na un total di 53 hits. Esaki ta Bogaerts su di 4 aña den liga mayor Mericano (debut 20 augustus 2013) y su di 3 den temporada completo. Su ultimo 7 weganan el a dal 15 hit, score 9 biaha, empuha 8 careda, dal 2 homerun y poncha 6 biaha. Su carera te cu awor ta poni na 24 homerun, 19 base roba, y 154 careda empuha. Wak e homerun di diadomingo atrobe aki.