N.V. Elmar y sindicato U.E.A. a acorda 'cooling off period'

ORANJESTAD  - No por papia di un conflicto laboral na N.V. Elmar, sino mas bien di un rebeldia di un grupo specifico di empleadonan, sin envolvimento di sindicato Union Electricista Arubano, U.E.A. Asina e comunicado di parti di e gruponan a informa diadomingo anochi. Segun e comunicado aki, ta e grupo specifico di empleado 'rebelde' , cu a y ta purbando destabilisa directiva di e sindicato a organisa accionnan sporadico, strobando operacion di e compania nacional di distribucion di coriente. Un accion cu a tuma lugar na comienso di fin di siman aki. 

NEGOCIACION 

Hecho ta cu pa lunanan largo N.V. Elmar a negocia un contracto colectivo nobo cu sindicato U.E.A. Despues di hopi discusion, a logra yega na un CAO cu directiva di U.E.A. ta di acuerdo cu ne. Pero a confronta rechaso ora a present'e na e miembronan. 

DEBATE CONTRA DIRECTIVA DI UEA

Locual ta sosodiendo awor cu algun miembro a start un debate contra e directiva actual di U.E.A., yamando reunionnan bou ora di trabou, sin consulta cu sindicato ni cu gerencia di N.V. Elmar. Cu e realidad ey riba mesa, e mesun sindicato a anuncia un periodo di "cooling off period" y a envolvi Mediador di Gobierno den e proceso aki. Directiva di U.E.A a suspende e miembronan envolvi den e "wild strike".

A TUMA MEDIDA DISCIPLINARIO

Di otro banda, gerencia di N.V. Elmar a tuma medida disciplinario contra esunnan cu a stroba operacion di e compania, dor di yama reunion y saca e trahadonan pafo bou ora di trabou. Como cu nan accionnan no ta di sindicato y no por papia di un conflicto laboral, a atende e asunto aki individual.

DISCULPA NA CLIENTELA

N.V. Elmar ta pidi disculpa na su clientenan pa e inconveniencia cu e accionnan di diabierna ultimo por a causa, debi na reunionnan ilegal di algun trahado disgusta cu directiva di nan mesun sindicato. A palabra cu U.E.A cu lo no tin accion durante e periodo di "fria cabes" cu nan mes a solicita, den un esfuerso pa sinta cu e miembronan y evalua e proposicion riba mesa miho.