Cu estado financiero positivo, Carubbean Festival cla pa cuminsa

SAN NICOLAS - Despues di un ausencia di 4 luna, tur cos ta cla pa un otro temporada di e Carubbean Festival, un festival patrocina pa gobierno di Aruba. E festival inicialmente mester a cuminsa na april di e aña aki, pero mirando cu ta te cu siman pasa diaranson Parlamento a aproba e fondo conoci como TPEF (Tourism Product Enhancement Fund) cu ta subsidia parti grandi di e festival, a crea un tardansa chikito. E suma cu TPEF ta inyecta na e festival ta 125 mil florin. E prome fecha ta conoci cu ta 26 di mei proximo.  

EXTRA ATENCION

E minister responsabel pa e turismo Otmar Oduber a comenta cu e festival lo inicia cu extra atencion riba e calidad halto cu kier pa esaki tin. Carubbian mientrastanto ta bay cumpli 5 aña y a pasa den man di 3 diferente hunta di supervision, unda cada un a contribui y haci nan trabou debidamente. Segun e mandatario a sigura , '"e bunita di e aña y temporada nobo aki ta cu pa prome biaha a percura pa tur e gastonan cu a haci como inversion di entre otro mascarada, stoel, mesa y tentnan di Carubbian Festival, cu tabata un peso financiero pa e directiva, e aña aki e hunta di supervision a logra pa elimina esaki completo unda cu 26 di mei 2016 ta cuminsa cu un presupuesto positivo den e bukinan financiero". Como tal segun e mandatario, Carubbian Festival ta cuminsa awor den un estado financiero positivo, caminda cu a elimina practicamente tur e debenan cu e diferente proveedornan desde 5 aña pasa cu nan a cuminsa. Henter comunidad ta keda cordialmente invita pa forma parti di e apertura di e temporada nobo di Carubbian diahuebs, 26 di mei proximo.