E bapor crucero mas grandi di mundo a cuminsa su prome biahe

SAINT-NAZAIRE - Decenas di miles di Frances a mira e bapor crucero mas grandi di mundo cuminsa cu su prome biahe, rumbo pa South Hampton, Inglaterra. E bapor Harmony of the Seas ta parti di e famia di Royal Caribbean cu tin e serie aki pa su cuenta. Harmony, osea su apodo 'e ciudad flotante' a sali for di e haf di Saint-Nazaire despues di 32 luna di construccion. E bapor ta wordo spera na Inglaterra diamars awor. Su rumannan manera Vision of the Seas y otronan ta bishita Aruba frecuentemente. 

E DETAYENAN

E bapor ta midi 362 meter di largura y esey ta hacie 50 meter mas largo di e punto mas halto di e toren di Eiffel na Francia. E hanchura di e bapor tambe ta un record cu e midi di 66 meter hancho. E tin un total di 16 piso cu tin espacio pa 6360 pasahero y 2100 tripulante. Un total di 23 piscina a bordo, y un parke cu mas di 10 mil mata y 50 palo di mata, e pasaheronan por disfruta 'leu di e lama'. E intencion ta pa den e zomer aki e bishita varios haf mediterraneo. Dia 24 di mei e ta mara na e haf di Rotterdam na Hulanda. E operador y doño di e bapor, Royal Caribbean Cruise Lines ta spera cu esnan rico di mundo lo tin suficiente interes pa saca e placa bek di 1 biyon euro, e prijs di e bapor aki. Fuente. NOS.nl.