Gobierno di Aruba y Citgo a yega na un acuerdo

ORANJESTAD - Gobierno di Aruba y Citgo a anuncia diabierna atardi cu nan a yega na un acuerdo satisfactorio y asina por a finalisa e negosacion pa e 'efinite Participation Agreement'. Partidonan a yega na un acuerdo riba e terminonan comercial y legal pa e rehabilitacion di e facilidad (refineria) na Aruba. Mientras cu falta pa firma e documentonan final ainda, partidonan ta di acuerdo riba tur punto. Detayenan legal y operacional lo keda anuncia despues. Segun minister Mike de Meza entrante 1 di augustus caba lo cuminsa cu e rehabilitacion di e refineria y ta spera cu den cuestion di 2 aña e refineria lo ta completamente operacional.

KICO POR SPERA

Den cuadro cu e politica di gobierno su pensamento di sostenibilidad, e refineria lo wordo converti den un facilidad capabel pa utilisa gas natural como su fuente di energia principal y asina limita emisionnan. E facilidad lo procesa petrolio crudo y/ of upgrade petrolio crudo extra pisa den un capacidad nominal general di 209MBPD. Citgo lo drenta den un lease agreement di 15 aña cu un opcion pa extende pa 10 aña. Den e dianan siguiente, lo pasa pa firma e documentonan legal, pa asina e ceremonia di firmamento tuma lugar. Keda pendiente pa mas informacion.