ASTEC: Maneho waf na Barcadera ta cumpli cu regla di seguridad

ORANJESTAD - ASTEC ta mara na cumplimento cu reglanan internacional. Como tal e ta maneha waf na Barcadera cumpliendo cu reglanan di siguridad. Despues cu e accion di douane a termina diabierna atardi, e compania ASTEC a presenta nan banda di medaya di e accion di un dia y mei, pa medio di un comunicado. Manera ta conoci, diahuebs ultimo a presenta un situacion fastioso na entrada di waf, durante control rutinario na porta. Segun ASTEC, algun recherche di Aduana no ta contento cu e reglanan di siguridad y como tal, hunto cu nan sindicato SADA, a dicidi di blokia entrada y salida di nos waf. Consecuentemente nos waf di carga no por a opera normal y riba diabierna e accion di protesta a continua.

PROFESIONALISA OPERACION

ASTEC ta mustra cu ora a opta pa muda waf di Oranjestad pa Barcadera, a opta tambe pa profesionalisa e operacionnan, haci nan mas eficiente, mas moderno pero specialmente mas sigur. Cu esey den mente, ASTEC, e operador exclusivo di nos waf di carga na Barcadera ta responsabel pa garantisa Aruba Ports Authority (APA), cu ta mantene reglanan estricto di siguridad.

DOUANE A NENGA SWIPE

Aunke tur ta compronde y ta consciente di e reglanan internacional aki, toch algun Douane Recherche ta nenga di "swipe" nan badge pa drenta waf of sali for di waf, pa motibo cu ta sinti cu nan ta autoridad. Aki a presenta un diferencia di opinion, pa cual ASTEC a informa APA, kende tambe ta para riba cu no por desvia for di reglanan di ISPS, pa ningun hende of departamento.

ACCION DI EFECTO SERIO

ASTEC ta haci un apelacion riba directiva di sindicato SADA, pa tene cuenta cu e accionnan di protesta tin consecuencia serio pa operacion di waf, pa e integridad di waf den mantene reglanan di siguridad internacional y sin lubida daño innecesario na nos economia. No cumplimento na reglanan di siguridad por tin consecuencia grave pa nos industria di barco, pasobra ningun agencia kier drenta cu nan barco na un waf cu no por garantisa e medidanan minimo di siguridad. ASTEC ta lamenta masha cu, aunke e departamento di Aduana ta bon consciente di tur e reglanan aki y ta na altura di tur aspecto di siguridad, cu toch ta opta pa tuma un actitud intransigente cu no ta laga mucho espacio pa ASTEC cu cana camindanan legal pa por garantisa cu no ta falta na cumplimento cu reglanan di ISPS y cu e concesion firma cu Aruba Ports Authority N.V.