OM: A prolonga detencion di homber den caso di Tanki Flip

ORANJESTAD - E homber responsabel pa e cachonan haya na su cas e siman aki na Tanki Flip esta Gilbert v. V ainda ta deteni den un cel policial.  Vocero di Ministerio Publico Ann Angela a confirma cu su detencion a keda prolonga cu 8 dia riba 12 di mei, esta ayera. "E ta ainda 'in verzekeringstelling'. Pa loke ta e cargo cu e ta cera p'e ainda, esaki oficialmente segun Angela, ta 'verwaarlozing'. E investigacion ta andando anto a base di esey, fiscal lo tuma desicionan pa loke ta e situacion di e cachonan" Angela a sigui bisa. Pero lo mester warda e investigacion caba pa por bisa mas tocante e aspecto ey.  

E CASO DI DIAMARS

Manera NoticiaCla.com a raporta inicialmente, tabata un situacion hororoso y espantoso ta loke autoridad a haya na un cas na Tanki Flip diamars atardi. Un cas cu mas di 100 cacho y pushi unda cu hopi tabata sea morto, muriendo of den un estado cu no tabatin solucion pa nan segun esnan presente. Tur caminda den y pafo di e cas a haya e cachonan den un situacion totalmente fuera di control y ahigienico. A raiz di loke autoridad a haya na e cas na Tanki Flip 73,  polis Lito Laclé a detene e homber  van V. a base di articulo 366 lid 2, cu ta basa riba 'verwaarlozing'. Esnan cu tabata presente no por a kere locual nan a haya na e cas. Sigur no di e persona cu a profila su mes como e 'Aruba dog whisperer' esta experto riba cacho, cu awor ta deteni. 

CACHO TUR CAMINDA

Tabatin cachonan tur caminda, den saco riba piso, den cura di e cas. Hasta a haya 15 pa 20 puppies (cacho baby) morto den un freezer. "Tur caminda tabatin cacho. Horibel!" un persona cu tabata na e sitio, a bisa NoticiaCla.com. Riba un truck a haya no menos cu 80 cacho hopi malo cu cu mester a wordo poni drumi pa veterinaire dienst. Algun cacho a ser haya bibo scondi den e cas. 

SITUACION BRUHA 

E situacion tabata uno caotico unda cu no ta exactamente cla kico tabata sosode den e cas. Pero for di e informacion cu por a acumula, e personanan tabata biba den e cas incluyendo e persona cu a keda deteni, cu tabatin su mama tambe eynan cu mester a wordo transporta pa hospital pa tratamento di posibel sarna.  Tabata atende cu e cachonan aki den un forma inhumano. NoticiaCla.com tin comprondi cu departamento di salud tambe tabata na e sitio y tin e caso aki bou investigacion. No ta descarta cu dentro di e proximo oranan lo tin mas informacion di un forma mas 'oficial' pa duna claridad riba e loke a wordo encontra na e cas. Preguntanan cu ta surgi entre otro ta p.e con e persona tabatin asina hopi cacho, di ken e cachonan tabata y con bin no a haya sa di e situacion aki prome.