Staring: Mester siña di caso di Tanki Flip y wak con ta bay remedia esaki

ORANJESTAD - Departamento di salud despues di a ricibi e rapport di e keurmeester di departamento veterinario, departamento di salud lo sinta cu polis cu tur otro stakeholders, pa trata e proyecto 'responsible peto ownership'. Esaki a raiz di loke a sosode e siman cu e caso di Tanki Flip. Aki durante un patruya rutinario, polis a encontra un cas cu mas di 100 cacho y pushi, den estado hororoso, y cu mester a tuma paso drastico. A elimina tur e bestianan pa nan propio seguridad, segun protocol. Asina miembro di management team di DESPA Jerry Staring a bisa NoticiaCla.com.

EVALUA SITUACION

Segun Staring, mester uza momentonan manera esaki pa evalua kico ta haciendo riba e tereno aki y pakico nos ta haciendo esaki. "Muy probablemente nos ta bay topa un of dos di e casonan asina na Aruba", Staring a bisa, referiendo na esun manera na Tanki Flip. "E no ta algo cu ta solamente di polis of di DESPA. Nos tin cu haci hunto cu comunidad. Nos tin diferente hende cu tin experticio riba tereno di trata bestia, los di cacho y pushi y pahra" Staring a sigui bisa. Como tal tin cu biba mas segun e regla di 'responsible pet ownership'.