Plasterk: Postula candidato (Mito Croes) no ta un nombracion automatico

ORANJESTAD – No ta pasobra gobierno di Aruba a propone un candidato (pa bira miembro di Raad van State) cu esaki ta conduci automaticamente na su nombracion.(lesa contesta di e preguntanan di Plasterk aki). Minister di relacionnan di Reino Ronald Plasterk ta contesta miembronan di Tweede Kamer van Toorenburg (CDA) y Hachchi (D66) riba nan preguntanan referente nombracion di Mito Croes den Raad van State. Tambe Plasterk ta confirma cu ainda no tabatin ningun nombracion y cu asina cu un persona wordo nombra, cu e lo wordo haci publico.Den e carta cu e dos miembronan di Tweede Kamer a manda, nan ta haci tres pregunta basico. Entre nan, si e mandatario ta na altura di e carta cu ta menciona cu Aruba ta rabia riba e tardansa di un nombracion pa Raad van State. Plasterk ta contesta cu e ta na altura di e carta aki.

Y ora cu haci e pregunta pakico ainda no a nombra un representante di Aruba, y cu si berdad e tabata riba agenda pero a wordo kita, Plasterk ta haci su remarke manera menciona ariba. Esta cu cualkier decision y of tratamento den conseho di minister, ta secreto te ora cu e wordo publica oficialmente. Como tal e no por duna contesta si Mito Croes su candidatura a wordo trata te cu e la wordo kita di e agenda.

Tambe Plasterk ta mustra cu un nombracion asina ta sosode a base di articulo 13 di statuut di Reino, den acordancia cu gobierno di Aruba. “Esaki kier men cu minister di relacionnan interior (BZK) ta nomina un persona cu Aruba ta di acuerdo cune. Sinembargo esey no kier men cu e preferencia di gobierno di Aruba ta conduci automaticamente na un nombracion. Cu esey, Plasterk ta contesta e preguntanan cu a wordo haci na su persona e siman aki.