Relaciona cu situacion politico na Venezuela, Aruba a hisa nivel di alerta

ORANJESTAD - Relaciona cu e situacion politico na Venezuela, incluyendo marchanan y disturbionan civil, Cuerpo Policial Aruba hunto cu otro autoridadnan competente a opta pa hisa e nivel di alerta specialmente na nos costanan. Den un relato di parti di autoridad awe mainta, a informa pa medio di un relato oficial cu e medida di prevencion aki ta pa evita cu gruponan, sea pa miedo of pa busca miho porvenir, por crusa lama y bin Aruba.

MAS PATRUYA NA COSTANAN

Relaciona cu e situacion aki mes, Mando Policial desde e siman aki caba a hisa e nivel di alerta y publico lo nota mas patruyanan policial cerca di nos costanan. E alerta por encera extra control riba movecionnan tanto riba lama como na tera. Separa di Polisnan den patruya, a percura pa aumenta presencia di Polisnan Maritimo riba lama, cu sosten y cooperacion tambe di Warda Costa di Caribe Hulandes cu tambe a aumenta nan presencia riba lama den e dianan aki. 

LO TIN MAS CONTROL NA AREANAN CONOCI

Aunke cu e alerta y extra vigilancia ta pa tur costa di nos isla, toch lo por nota mas accion y control di Polis den areanan conoci manera ta e beach di Arashi, na Santana di Cacho den Lago Colony y na e costanan pariba manera Baby Beach y Rodgers Beach. 

COOPERA CU POLIS

Ta avisa adelanta di e desaroyo aki, den cual ta conta cu cooperacion di comunidad pa suministra informacion na Polis asina cu nota movecionnan straño, pero tambe pa avisa automobilistanan cu lo por para nan na cualkier momento pa controla. Ta pidi disculpa for di awor caba pa cualkier inconveniencia, pero ta pa por garantisa mas siguridad na henter nos comunidad.