Arends: Gobierno 'on track' pa firma deal cu Citgo diabierna

ORANJESTAD - Tur cos ta mustra cu pa diabierna gobierno di Aruba lo firma un deal cu Citgo. Por lo menos asina e persona cu ta lidera e team negosaho pa Aruba esta Richard Arends a sigura NoticiaCla.com. Asina tambe e ta desmenti informacionnan cu ta circula for di dos dia caba, cu tabata bisa cu 'gobierno no ta cla pa firma diabierna ainda'. "Si, nos ta on track pa diabierna" Arends a sigura NoticiaCla.com diaranson. E supuesto motibo duna pa e posponemento atrobe, tabata cu 'gobierno Venezolano a rekeri un combersacion cu prome minister Mike Eman prome cu Venezuela duna su aprobacion pa e deal'. Algo cu segun Arends, no ta berdad. 

NO TA CLA PA FIRMA AINDA?

For di den siman, NoticiaCla.com a haya informacion cu e deal di diabierna (e deadline cu gobierno di Aruba a pone pa keda cla pa firma e 'definite participation agreement' cu Citgo) no ta cla pa wordo firma. Como motibo, a duna cu un di e cabesnan halto den gobierno di Venezuela, Diosdado Cabello a exigi un combersacion cu tanto prome minister Mike Eman y minister Mike de Meza ya cu nan no tin claridad riba e deal. Mientras cu ta cu Citgo ta firmando, PDVSA ta sigui ta doño y gobierno Venezolano ta doño di e refineria. Esey lo a pone cu no por a firma diabierna ainda tanten e combersacion ey no tuma lugar. E informacion ricibi tabata for di seno halto di gobierno di Aruba mes. Ta bin acerca cu miembro di oposicion Glenbert Croes tambe a haci un declaracion semehante, aunke los for di e informacion cu NoticiaCla.com a ricibi. 

TRANSACCION COMERCIAL

Segun Arends, e acuerdo cu tin cu firma diabierna ta uno in principio un transaccion comercial. "Dus no tin envolvimento politico". Segun Arends, un bishita pa Venezuela riba e nivel ey no ta algo cu ta cay den competencia di Aruba sino Reino Hulandes. Di otro banda, a surgi e pregunta, cu si no ta politico, con bin ta gobierno ta firma cu Citgo y no ta firma entre Citgo y e compania cu tin cu representa gobierno.

TALK SHOW ATV

Den e programa tipo talk show na ATV diaranson anochi modera pa e periodista Patrick Paskel y director Tom Pietersz, minister Mike de Meza y Alvin Koolman a trata e topico di e caso di Citgo y su embergadura. Aki no a tende ningun momento cu e deal lo a wordo posponi atrobe. Y e programa aki a wordo graba ayera, pues e ta uno actual. Den e programa ningun momento a duna indicacion cu lo tin un posponemento di e deal aki, aunke esey no ta nifica cu e deal no por a wordo posponi. 

FALTA INVITACION DI GOBIERNO

Cu tur esaki, ta keda pues habri kico ta pasa diabierna awor. Hecho ta cu e deadline ta vence diabierna unda cu partidonan tin cu presenta un acuerdo final. Te cu diahuebs mainta no a bin ningun invitacion di parti di gobierno pa un firmamento, aunke cu ultimo biaha tambe, ta dia di e evento mes den curso di dia, a bin un invitacion pa un conferencia di prensa atardi laat pa anuncia un update riba e situacion.