Staring: No tin duda cu unico alternativa tabata pa pone e cachonan 'drumi'

ORANJESTAD - E unico solucion pa e problema na e cas na Tanki Flip unda cu a haya e cantidad grandi di cacho diamars den dia, tabata pa pone e cachonan cu a wordo haya eynan diamars drumi. Den un entrevista exclusivo cu NoticiaCla.com, e miembro di management team di departamento di salud Jerry Staring a conta su experiencia di e situacion horendo cu a wordo descubri. Conciente di e  critica pakico mester a pone tur e cachonan y pushi drumi, tambe e tabatin reaccion "No tabatin ningun duda cu esey tabata e unico cos humano pa haci, pasobra tur sin excepcion tabata den hopi mal estado. Tur e bestianan a wordo poni 'drumi'". Tanto Staring como su personal a keda bou di impresion di e situacion cu nan a bin haya e cachonan, y e señora den e cas aden. "Den henter mi carera nunca mi no a mira algo asina den mi bida" Staring a bisa NoticiaCla.com. Segun e autoridad di salud, ela wak hopi cos den su bira, pero no asina. Y e ta spera cu esaki ta un wake up call pa nos comunidad di con no mester trata nos bestianan. 

KICO A PASA

Ora cu e departamento di salud a bay na e sitio cu un personal di 3 pa 4 persona, a bay cu e loke nan ta yama un 'afstandsverklaring' cu ta pone e doño(nan) di e bestia(nan) firma cu nan ta entrega nan derecho di cuida e bestia(nan) y pasa esaki pa otro persona. Sinembargo ora cu nan a yega na e sitio, nan no por a imagina cu lo a encontra cu asina hopi cacho y pushi. E cantidad exacto Staring no por a bisa, pero sigur riba 100 cacho. "A conta como 85 cacho cu tabata bibo, pero no tabata cana. Nan tabata djies hala rosea. Un bista hopi tristo unda cu bichi tabata sali for di nan " Staring a sigui bisa. A haya tambe por lo menos 25 pa 50 cacho (di loke cu Staring por a wak) morto tur caminda den saco parti riba henter e tereno. Caranan cu Staring a wak di tanto su personal di departamento di salud como di esnan di polis no tabata nada agradabel pa wak. "Tur tabata wak spanta!". 

SITUACION DI MAMA  

Manera ta conoci, autoridad policial a conta cu nan a haya e mama di e homber cu tabata encarga cu e cachonan, den un camber rondona pa 20 cacho. Su estado tabata basta malo tambe y e tabatin sarna na su curpa. Staring a confirma cu e persona aki a keda transporta pa hospital pa tratamento. Rumornan cu hospital lo a rechasa e dama pa miedo di cu e por a plama mas malesa, Staring no por a confirma. "Mi no a tende esey. Si esey tabata e caso, mi lo a haya sa" Staring a bisa. E dama a wordo trata y despues transporta pa un cas di cuido. Loke si a confirma ta cu e problema di e señora ta bou di vigilancia di DBZ (Dienst Besmettelijke Ziektes). De hecho, tur dos persona lo haya e tratamento pa mira si nan por a haya un of otro malesa di e cachonan. 

LO TEST E HOMBER SU ESTADO MENTAL

Mas prome, polis no por a splica kico e estado mental di e homber cu nan a detene tabata. Obvio mirando cu nan no ta medico, y cu esey ta keda na esnan experto den e ramo di salud. Aki Staring a confirma cu lo haci un evaluacion mental di e persona aki Gilbert v V, pa sa kico su estado mental ta. "Ta hopi importante pa e meneer aki haya un bon evaluacion, pasobra loke nos a tref aan no por ta normal!". Si e persona tabata un persona cu problema mental, Staring no por a confirma pa NoticiaCla.com. Unico cos cu Staring por a bisa ta cu ora cu a detene e persona, e persona no por a wordo evalua, y esey ta bay sosode si pa medio di un psychiater. "Esey ta den man di polis pa regla esaki, y nos ta mas cu dispuesto pa coopera den e caso aki. Mi sa cu polis tambe tin su preguntanan pa haya sa kico tur por a sosode", Staring a bisa finalmente.