Evelyn Wever: 'Ami no tin nada di haci cu Panama Papers'

ORANJESTAD - "Ami no tin nada di haci cu Panama Papers, ni Panama". Asina e lider di e partido geel MEP Evelyn Wever Croes a declara den un carta habri cu el a publica relaciona cu e tema menciona. Segun Wever, ela tuma nota cu politiconan di AVP a gara e informacion di Panama Papers pa bolbe haci politica barata atacando su persona. Y como tal el a dicidi pa refuta tur esaki como clarificacion. 

ENVOLVIMENTO DI BUFETE CROES WEVER TCHONG

"Loke ami a lesa riba e website tocante Panama Papers ta cu e nomber di sr Tchong di bufete di abogado Croes Wever Tchong a duna servicio na dos cliente cu tin laso cu un compania na Panama y manera e website di Panama Papers mes ta bisa, cu esaki no kiermen cu ta algo malo" Wever ta sigui bisa. Aki e ta admiti e presencia di e nomber di e bufete cu ta relaciona cu su famia, pero no cu necesariamente ta nifica cu a haci algo malo. Segun Wever, minister Angel Bermudez por confirma esaki pasobra segun Wever, Bermudez tambe a traha cu structuranan di Panama. "E bufete di abogado Croes Wever Tchong ta existi casi 50 aña y durante e 50 añanan ey a conose miles di cliente. Awor ta resulta cu dos cliente di e miles di clientenan tabata tin compania na Panama. No ta e bufete Croes Wever Tchong tin compania na Panama, ni Hendrik Croes, ni Evelyn Wever-Croes. Ta varios otro cuidadano di Aruba tin e companianan ey" Wever a sigi bisa. " Mi ta bolbe bisa: ami no tin nada di hasi cu Panama Papers, ni Panama. Mi nomber no ta aparece riba ningun lista y ningun website". Segun Wever cu Sr. Sneek (parlamentario pa partido AVP), cu un record criminal impresionante na Aruba, ta insinua awor cu Wever lo a 'ontduik' belasting tambe ta un mentira. " Mi tabata inspector di belasting pa 13 aña y despues mi a traha como consehero fiscal y mi ta cumpli debidamente cu mi obligacionnan fiscal" Wever a sigui bisa. USO DI E BUFETE

Cu dos di e miles di cliente durante casi 50 aña di bufete di abogado Croes Wever Tchong a haci uzo di un compania di Panama, riba su mes no ta desacredita e bufete pasobra e bufete ta brinda servicio y ta paga belasting aki na Aruba riba tur servicio, tanto winstbelasting y BBO. Pues tur insinuacion cu aki ta trata di keda sin paga belasting pa e bufete di abogado, no ta corecto segun Wever.

ARGUMENTO A CABA

"Mi ta compronde si cu ora argumento caba hendenan ta recuri na cualquier cos pa sconde nan propio erornan. Ami no tin nada di haci cu Panama Papers, ni cu Panama. Esun cu kier acusa, bin cu prueba, sino keda keto. Es mas, mi ta reta cualquier persona pa publica prueba contrario" el a sigui bisa. " Mi sa cu nos ta yegando mas cerca di eleccion y mi ta cla p'e."