Criminal Holleeder a contrata miembro di gang di Corsou pa mata su rumannan

AMSTERDAM - Conocido criminal Hulandes Willem Holleeder a pidi asistencia di dos miembro di gang di Corsou No Limit Soldiers pa asesina su dos ruman muher. Esey ministerio publico a raporta awe mainta den corte na Hulanda. Den su cel proteha (EBI) e lo a probecha di un momento pa e asesinato tuma lugar. E prome pa muri, mester tabata e ruman Astrid. "E tabata esun mas importante" OM a raporta segun e corant Hulandes NRC Handelsblad.  Despues mester a liquida e otro ruman Sonja y e periodista di crimen Peter R de Vries. Ora cu OM a descubri e plan aki, a 'detene' Holleeder den su cel na EBI pa esaki luna pasa. Pero ta awe mainta e informacion a bira conoci. 

CONTACTO CU COMPAÑERO DI CEL

Holleeder ta deteni den un centro hopi extrictamente vigila, pero toch a sa di establece contacto cu dos compañero di cel. Ta trata di dos yiu di Corsou miembro di e banda impopular No Limit Soldiers. E banda aki hopi biaha a wordo envolvi den atentadonan criminal, y OM ta te hasta relata e banda aki cu e morto di politico Helmin Wiels. E dos personanan a haya orden di Holleeder pa yama un cierto number di telefon y consecuentemente papia den un forma di codigo. For di e investigacion, e dos personanan aki mester a involucra otro miembronan di e banda criminal aki pa ehecuta e tres likidacionan aki. Pa e acto aki a paga 5000 euro adelanta caba. Ambos a haya un number di telefon pa yama y un palabra codifica pa uza. Pa loke ta placa, Holleeder lo tabata dispuesto pa paga entre 60 pa 70 mil euro. Ministerio Publico a informa cu ta investigando e caso den tur profundidad y kier pa Holleeder keda bou vigilancia hopi estricto den aresto preventivo. Foto ANP.