Na comienso di 2017 inspeccion di salud lo ta independiente atrobe

ORANJESTAD - Intencion ta pa na comienso di 2017, presenta un departamento di inspectie di salud independiente atrobe. Segun minister actual di salud Alex Schwengle, e minister anterior (Booshi Wever) a haci un cos cu segun e mandatario, 'eigenlijk no ta klop'. Segun Schwengle, Wever a split inspectie di salud e tempo ey pa motibonan politico posiblemente. Esey a pone cu e inspectie di zorg a wordo poni como un departamento den directie. "Esey ta nifica cu bo director ta inspector tambe, cu ta algo cu no por. E no ta klop" e mandatario a sigui bisa uzando e dicho Hulandes cu ta bisa cu e 'carnicero ta aproba su propio carni'. Algo cu no por segun Schwengle.

DEPARTAMENTO INDEPENDIENTE

Segun e mandatario, Departamento di Salubridad Publico tambe ta un partner den full e cadena di cuido. Esey ta nifica cu inspectie lo bolbe bira un departamento independiente. E parti di conflicto di interes ta existi ainda cu e mandatario kier resolve door di haci'e independiente. Ademas e departamento falta trahado. Como tal no por atende cu tur e casonan cu ta causa retraso. Pa januari 2017 e mandatario kier haci esey.