Dammers: Parlamento leu di cla pa por trata modificacion ley all inclusive

ORANJESTAD - Mientras cu minister di turismo Otmar Oduber tin pura pa e ley di all inclusive pasa, parlamento ta tumando su tempo. For di vice presidente di parlamento Chris Dammers, NoticiaCla.com a compronde cu 'no tin dia' pa e reunion tuma lugar. Mirando e proceso cu tin cu tuma lugar, e por tuma lugar porta net prome cu recess of despues. Y esaki mientras cu e mandatario di turismo ta mustra cu mas tarda, mas e chens ta cu companianan por haci y deshaci den e mundo di all inclusive, den sentido cu por tuma hotelnan existente y comberti nan den propiedad all inclusive, pasobra no tin ley pa stroba esaki. Mirando esaki e mandatario di turismo a manda un carta ayera pa tur hotel pa informa nan di e regla nobo pendiente e ley.  

NO TIN FECHA PA REUNION

Segun Dammers, no tin fecha pa trata e reunion ainda. "Nos a duna 1 luna pa (parlamentarionan) entrega (e) preguntanan. Esey ta te dia 8 di juni proxmo. Despues parlamento lo formula e preguntanan den un reunion di comision central pa despues e preguntanan bay pa gobierno. "Ora haya e contestanan den e 'Nota Naar Aanleiding van het Verslag' nos por jama e OV (reunion publico) despues di 4 dia" Dammers a bisa NoticiaCla.com. Notabel ta cu parlamento a pidi suficiente espacio pa por scucha tur stakeholder involucra. Esey ta nifica cu por lo pronto no lo trata e ley aki.