Oduber: Permiso nobo pa all inclusive lo ta mara na tempo defini

ORANJESTAD - E propiedadnan cu te cu 9 di mei 2016 tabata tin un operacion All-inclusive of un mescla di plannan cu nan operacion existente lo wordo honra ora cu nan pidi permiso nobo. E mandatario di turismo Otmar Oduber a anuncia dialuna mainta cu e aviso a sali pa tur hotel informando nan di e proceso. E anuncio aki, segun e mandatario  no mester ta un sorpresa pa e propiedadnan mirando cu un proposicion legislativo a wordo manda dia 12 di april 2016 pa parlamento incluyendo un sistema di permiso special pa hotelnan cu ta ofrece paketenan di All-inclusive pero cu ta cuadra cu e "vergunningstelsel". Den esaki ta stipula cu pa e propiedadnan cu no tin operacion All-inclusive cu nan por ofrece paketenan special di All-inclusive te cu un maximo di 20% di nan capacidad. 

MAXIMO DI INVENTARIO

Kier inicia na e punto aki unda lo respeta locual tey caba te cu un maximo di 40% di e inventario di acomodacionnan na Aruba. Conforme e maneho di Gobierno pa respeta e situacion actual di e cantidad di acomodacionnan All-inclusive, e proposicion legislativo ta stipula cu pa haya un permiso pa opera un All-inclusive lo ta basa riba e "vergunningstelsel" existente, unda cu pa e fecha di 9 di mei 2016, pues na momento di e anuncio oficial, e propiedad cu tin e acomodacionnan tipo All-inclusive, tanto parcial of completo, lo haya un permiso pa esaki. 

DURACION DI PERMISO

E permiso lo ta vigente pa un duracion di 20 aña. Tur Hotel lo mester regla un permiso nobo y asina evita un expansion di propiedadnan All-inclusive riba nos isla. Gobierno ta para pa un balans saludabel di diferente tipo di acomodacion of di tipo di propiedadnan hotelero y no ta para pa un eliminacion completo di propiedadnan All-inclusive. Rason principal den esaki ta mirando e crecemento rapido di e mercado aki den e industria pa e siguiente 10 aña y adicionalmente ta mira un crecemento di e concepto di All-inclusive te hasta den e mercado vacacional luhoso. Ta importante pa Aruba como producto keda competitivo, creando un balans sin elimina Aruba como posibel destinacion of pa e turistanan cu ta mira opcionnan vacacional cu ta inclui acomodacionnan All-inclusive. 

.