Listramento preventivo a produci 18 detencion

ORANJESTAD - Listramento preventivo den fin di siman a produci 18 detencion. Asina polis a raporta dialuna pa medio di nan departamento di publicidad. Diabierna y diasabra for di 6:00pm te cu 6:00am a tuma luga un accion grandi di Polis, conoci como listramento preventivo den algun area specifico mayoria den districto di Noord y area hotelero. Polis a listra centenares di ciudadano y a logra kita varios arma ilegal y droga for di caminda.

HOPI EKIPO RIBA CAMINDA

Na tur a sali cu un total di 85 Polis pa e accionnan aki, cu a inclui e ekipo di Mobiele Eenheid, unidad di cachonan K9, ekipo motorisa, Strand Politie, Team di Aresto, Polisnan di districto di Noord y uzando e ekipo di transporte di Cuerpo Especial Arubano. 

ACCION DIABIERNA

Diabierna a start cu un accion di e departamento di Recherchenan di districto di Noord cu a haya sosten di tur e ekiponan ariba menciona pa efectua algun detencion importante, pero peligroso. Na tur a detene 5 sospechoso na un cas situa na Saliña Cerca. 

LISTRAMENTO DEN VARIOS AREA

Despues a continua cu listramento preventivo den varios area, manera anuncia di antemano. Na tur a listra un cantidad di hende, pero na final a detene 5 sospechoso, pa motibo di tabatin droga den nan poder. Despues di interogacion, 2 di nan a keda encarcela pa mas investigacion. Alabes a tuma 9 auto den beslag pa investigacion of pa falta di documentonan necesario.

DETENCIONAN

Diasabra e accion di listramento a produci 8 detencion, di cual 5 tabata pa posesion di droga y 3 tabata pa bringamento. Lamentablemente e 3 bringadonan aki tur tabata menor di edad y tabata frecuenta un shopping mall sin supervision di nan mayornan. E tendencia aki tin Polisnan cu man yen tur weekend. Entre e armanan cu a confisca riba diabierna y diasabra ta inclui cuchiu, sker y otro atributonan di cual e doñonan a opta pa entrega nan na autoridad.

CONTINUA CU MAS ACCION

E intencion ta pa hunto cu Ministerio Publico, continua cu e tipo di accionnan asina, den cual ta listra tur hende den forma preventivo buscando pa arma y droga. Manera por mira, e anuncio di antemano no necesariamente ta nifica cu e sospechosonan no lo bay na e luganan menciona. Den bida real ta nota cu e mesun caranan ta sigui cay, sea ta haya nan cu arma of droga den nan poder. E otro tendencia fastioso ta cu edad di e sospechosonan ta sigui baha, mustrando cu mayornan tin masha poco supervision riba e muchanan aki.