Colegio Arubano lo tin rector nobo pa aña escolar 2016/2017

ORANJESTAD - Si tur cos bay bon, pa e siguiente aña escolar Colegio Arubano tin su rector nobo. Asina presidente di hunta di supervision di SMOA, Bart Kool E siman aki avisonan pa solicitud ta sali y SMOA ta spera di e biaha aki si por logra haya un rector cu no tin problema. Y pa sigura e biaha aki cu tin e criterianan pa garantisa cu ta busca un rector cu ta apto pa e funcion, a pasa tur e instancianan manera directie onderwijs, mayornan, docentenan y mas instancia. Mes momento SMOA ta kibra silencio riba e loke a sosode cu e rector anterior Hans Timmermans. Kool na nomber di SMOA ta admiti cu e escogencia di Timmermans no tabata esun miho. 

DIRECTIVA CU MAS AUTORIDAD

Desde januari di e aña aki ora cu a haya notificacion di problema, a instala sra Cameron como e rector interino. Mes momento, cu asistencia di minister di enseñansa, a duna e directiva di Colegio mas autoridad y caminda pa cana pa por eherce mas funcion posibel te ora cu un rector nobo keda instala e aña aki. 

MUCHO CAMBIO DI RECTOR

Kool ta admiti cu e situacion no tabata esun mas apto na Colegio pa loke ta rector, unda cu a te hasta compara e situacion cu e situacion di gobiernonan na Italia unda cu cada aña practicamente ta cambia rector. "Den e ultimo 10 añanan segun mi nos a cambia por lo menos 6 rector. E no ta faborabel pa un scol" Kool a bisa. Awor lo percura pa tin un rector pa un periodo mas largo y cu tin un sosten mas amplio di tur hende.