Kool: Enberdad rector Timmermans no a resulta manera cu a spera

ORANJESTAD - Rector Hans Timmermans enberdad no a resulta manera cu a spera. Asina presidente di Stichting Middelbaar Onderwijs Aruba (SMOA), Bart Kool a admiti na NoticiaCla.com, kibrando asina e silencio riba e tema aki. Na momento cu a anuncia e retiro di Timmermans algun luna pasa, a informa cu lo no divulga mas informacion riba e tema. Recientemente sinembargo, Kool a splica kico a sosode cu e asunto di Timmermans y comparti cierto detayenan nunca antes divulga durante un combersacion cu NoticiaCla.com. 

SMOA INCAPACITA PA SCOHE RECTOR?

E hecho cu Colegio Arubano a cambia no menos cu 6 rector den 10 aña ta casi duna e indicacion cu porta e problema no ta na e rectornan scohi, sino mas bien e incapacidad di e fundacion cu ta scohe e rector. Presidente di e hunta di supervision di SMOA (cu ta maneha e.o. Colegio Arubano) Bart Kool no ta completamente di acuerdo cu esey. "Den e 10 añanan ey hopi cos a pasa" Kool a bisa. Entre nan e ta referi na e hecho cu a despedi di un rector cu a funcion bon na Colegio pa mas di 20 aña. "A haci evaluacionan bon y escogencia corecto. Como tal no por papia cu nos a scohe hende 'malo' " Kool a bisa. "E ultimo 6 (rectornan) a crea algun disturbio na scol, pero no ta asina cu e scohencianan tabata malo" Kool a bisa na defensa di SMOA. Loke si e ta admiti den caso specifico di Timmermans, cu ey si SMOA a faya den duna e tarea di rector un otro contenido. "Esey no a bay bon" Kool a admiti. 

SALARIO HALTO DI TIMMERMANS

E salario halto di e ultimo rector (Timmermans) tambe tabata na discusion unda cu hopi a cuestiona esaki. Esey pasobra otro rectornan nunca no a haya e pago halto (maximo di 25 mil florin pa luna, incluyendo tur beneficio). Aki Kool a admiti cu en berdad e salario di Timmermans tabata hopi mas halto cu otro rectornan anterior. Pero e ta mustra cu esey tabata a base di e deseo ferviente di por a haya e persona ey. "Ora bo kier algo hopi mes, bo ta inclina pa paga (hopi) mas p'e", Kool a bisa NoticiaCla.com. Loke tambe Kool ta admiti, ta cu e scol no a haya e calidad pa e placa cu nan a paga p'e. "Awor den e aviso nobo di solicitud, ta anuncia cu lo paga e rector nobo segun ley y reglamento Arubano" Kool a bisa indicando cu e suma lo ta mucho menos cu loke a paga Timmermans. "Pa mi, nos a siña nos les" Kool a sigui bisa.