Polis a detene 5 sospechoso peligroso di Saliña Cerca

ORANJESTAD - Relaciona cu un investigacion grandi andando di algun tempo caba, diabierna anochi un ekipo encabesa pa Hues Comisario, Fiscal y Polisnan di varios departamento a haci dos huiszoeking. Por bisa cu ambos a duna bon resultado, den sentido di e sospechosonan deteni, droga cu a kita for di riba caya y arma di candela cu tambe ta den beslag.

DETETENCION DIABIERNA

Tabata diabierna pa 7:40 pm cu Recherchenan di Noord a detene e sospechosonan G.A.E, E.J.M.H, J.M.H y J.D. de C, acusa di lo a viola articulonan 2, 3 y 4 di nos ley di droga. A efectua e detencionnan aki haciendo uzo di Team di Aresto cu a drenta e cas Saliña Cerca # 57.Den dicho cas e defensornan di ley a topa cu un cantidad considerabel di droga, den e caso aki cocaina y marihuana.  Asina cu a caba di transporta e 4 sospechosonan ey pa Warda di Polis, a sigui pa un otro cas, Saliña Cerca # 8-A en busca di e sospechoso G.N.A.J "Gerito" Eckmeyer, pero no a topa cu ne. Sea e no tabatey na e cas mes of el a huy ora Polis a yega. Ta bon pa menciona cu durante e "Huiszoeking" den su cas a haya no menos cu 3 arma di candela. Pa cera e anochi, segun Polisnan tabata kedando cla cu e investigacion na e cas, den vecindario, na J.J. Snack a topa cu e sospechoso J.C.F.K., kende tin orden di detencion riba dje relaciona cu sospecho di lo a viola ley di arma. A detene mesora y hib'e Warda di Polis. A probecha cu a detene pa bay su cas tambe pa un "huiszoeking" pero no a haya nada particular, den e caso aki arma di candela.

BUSKEDA PA GERITO ECKMEYER

Na final Cuerpo Policial ta pidi cooperacion di comunidad, specialmente habitantenan di Noord, cu si mira Gerito Eckmeyer, pa yama 100 mesora. Ta consider'e un sospechoso peligroso, e por ta arma, pues djis yama Polis pa nan mes atende cu ne.