Pa fin di siman aki e 'deal' entre CITGO y gobierno mester ta cla

ORANJESTAD - Pa diabierna awor, mas tarda diadomingo gobierno di Aruba tin cu informa comunidad riba e deal cu tin, of no, entre CITGO y pais Aruba pa 'lease' e refineria di Valero. Gobierno dos luna pasa ultimo a informa cu tabatin mester di 6 siman mas di tempo pa por a keda cla cu e 'deal' y a palabra cu pa dia 13 di mei mas tarda, mester firma e 'definite participation agreement' cu CITGO. E siman aki e agencia noticioso Britanico Argus a raporta cu e fecha lo ta dia 15 di mei. Cua cu e por ta, pa fin di e siman aki mester tin claridad riba e tema aki. 

CAFT

Mientrastanto NoticiaCla.com a haya confirmacion di parti di e colegio di supervision financiero cu e luna aki nan lo saca nan conseho, irespecto e resultado di e deal cu Valero, y cu e luna siguiente nan lo bin Aruba pa papia cu gobierno di Aruba riba e tema aki. Manera ta conoci, gobierno di Aruba a pidi pa inicialmente papia na maart ora cu mester a keda cla cu e deal di CITGO pa tin claridad riba e panorama financiero di Aruba. Esey awor a move pa mei. Pero CAFT a bisa NoticiaCla.com cu e cambio ey, no ta afecta e schedule di e colegio y nan lo continua cu nan agenda, deal of no deal. 

PESO FINANCIERO

Manera ta conoci, e deal cu CITGO por alivia gobierno di Aruba cu un peso financiero grandi y trece trankilidad den e caha, y tambe cu CAFT. Pero si un deal no keda cera, CAFT a indica caba na gobierno di Aruba cu mester presenta por lo menos dos plan di contingencia cu mester por wordo activa pa 1 di juni, den forma di un aumento di BAZV cu 1 of 2%, of introduccion di un ABB (Algemene Bestedings Belasting). Realisticamente mira, CAFT ta sugeri pa e aumento di BAZV pa motibonan practico. 

SILENCIO HERMETICO

Pa loke ta trabounan di gobierno, hopi no por a wordo bisa y tin un silencio hermetico, y no ta papiando absolutamente nada riba e tema aki. E mandatarionan respectivo tabata na Merca e siman cu a pasa atrobe, pero no a divulga nada nada di e avancenan di e combersacionan aki. Algo cu no ta hopi usual. Ta premira sinembargo e siman aki cu gobierno lo por delanta algo di e tema aki. Oposicion a bisa caba cu nan no ta acepta ningun tardansa mas di gobierno y cu si no tin reapertura, e problema cu a surgi ora di pasamento di ley di AFT lo a keda chikito cu loke ta bin aworaki. 

DEAL 

E deal entre gobierno di Aruba y CITGO, mester inclui un deal pa lease e propiedad pa 25 aña, haci esaki den un forma mas berde posibel, tuma hendenan local primordialmente, y keda responsable pa cualkier limpiesa cu tin cu tuma lugar dia cu CITGO (si e bira e compania cu lease e propiedad) bandona Aruba. Foto cortesia NOTICIAS24