Dowers: Control di polis riba caya lo sigui pa kita arma y droga di caya

ORANJESTAD -  Manera ta conoci pa awor, diabierna anochi ultimo a tuma luga un operacion grandi, planea y ehecuta dor di varios instancia, manera Hues Comisario, Ministerio Publico y Cuerpo Policial Aruba, sin lubida Cuerpo Especial Arubano pa nan sosten den transporte di e detenidonan. A tene varios accion di listramento di cas ("huiszoeking") unda a haya arma y droga scondi den casnan. A detene varios hende, hopi di nan conoci caba pa husticia di Aruba. E mandatario di husticia Arthur Dowers a garantisa cu e tipo di controlnan asina lo sigui, pa kita mas droga y mas arma for di riba caya.

HUISZOEKING

Separa di e accion di listramento di cas ("huiszoeking") na diferente adres den Noord, tambe Polisnan a tene accionnan di listramento preventivo den varios area. Aunke hopi hende no ta contento cu e ley cu ta bisa cu mester avisa publicamente adelanta, toch asina mes a detene decenas di ciudadano cu toch tabata sea cana arma of cana cu droga den nan poder manera nada no a pasa.

MINISTER RIBA CAYA

"E ta importante pa no ta solamente den oficina y duna instruccion, pero pa ta riba caya hunto cu e Polisnan pa aprecia nan trabou y mira e retonan cu ta confronta c, pa asina nos duna e maximo sosten na henter Cuerpo Policial", asina e mandatario a duna di conoce diasabra marduga dilanti Warda di Polis na Noord, despues di varios ora di control preventivo y detencionnan relaciona cu posesion ilegal di arma di candela y droga.

PUEBLO TRANKIL

E mandatario a haci un intento tambe pa trankilisa e comunidad di e ola di atraco di e ultimo diananan. "Ta importante pa pueblo ta trankil cu, aunke cu tin hendenan cu continuamente ta ocupa nan mes cu crimen, cu nos sistema hudicial ta persigui nan, ta detene nan y ta percura pa procesa nan pa manda nan dilanti Hues pa ricibi castigo", e mandatario a subraya. El a enfatisa cu como Gobierno ta dificil pa drenta den cabes di e criminalnan aki pa preveni cu ta comete actonan ilicito, pero si por garantisa comunidad cu ta bay nan tras y ta gara nan tambe!

COMPRONDE TRABOU DI POLIS

El a termina enfatisando cu hopi biaha publico no ta compronde cu locual Polis sa, Ministerio Publico sa y Ministerio di Husticia sa, cu nan no por divulga esaki pa no stroba investigacionnan, pero tampoco kier cansa tur hende cu tur locual ta pasa den e pais aki. Publico hopi biaha ta haya tende of mira ora algo sosode of haci un daño, pero poco ta realisa cuanto trabou ta tuma luga pa preveni atraco, asesinato y hortamento grandi.