Polis a detene 2 sospechoso clave den asesinato di Lalo Webb

ORANJESTAD - Relaciona cu e investigacion andando ainda den e caso di asesinato cruel cu a sosode dia 20 di maart 2015, awe diabierna Recherche a detene e sospechosonan S.C.J. Martina y E.J.M. Herreira. E detencionnan a bay compaña pa listramento di cas (huiszoeking) cu a duna masha bon resultado.

E CASO MES

E caso di asesinato mes a tuma luga dia 20 di maart 2015 ora cu mainta trempan a bin topa cu un curpa sin bida, tur na sanger, den un auto na altura di Indian Rock Garden banda di pia di Hooiberg. A identifica e victima como Lyandro "Lalo" Webb naci dia 29 di juni 1991, pues di apenas 23 aña di edad. E victima tabata un conoci di husticia y tabata den un of otro gang di Madiki.

VARIOS DETENCION

Desde e dia ey Polis a detene varios sospechoso y a busca den diferente cas. A scucha varios testigo den e caso lamentabel aki y por corda cu a sigui varios acontecimento y losmento di tiro den barionan, tur liga na e mesun asesinato aki.

ENTRADA HUDICIAL

Relaciona cu e caso, Recherche a haya permiso di Hues Comisario pa busca den 3 diferente cas awe mainta. Mester menciona cu den un di e casnan a haya un cantidad di droga, cu consecuencia cu na e cas specifico ey a detene e sospechoso E.A. Herreira y V.P. Palacio Cano tambe, no pa e asesinato, pero si pa e droga encontra.

CASONAN DIFICIL

Cuerpo Policial Aruba ta subraya cu casonan tin biaha por ta dificil pa soluciona, debi na complicacionnan den diferente forma. Pero tanten cu informacion valioso ta sigui drenta, e caso ta keda na bida y ta sigui persigui e sospechosonan te ora hiba nan dilanti Corte pa castigo. Cu e dos detencionnan clave aki, husticia ta convenci cu ta dal un paso grandi den e caso di asesinato aki. No ta descarta cu por tin mas detencion. NOTA: No tin potret di e detenidonan.