Minister positivo pa introduci visa condiciona pa turista Venezolano

ORANJESTAD - Minister di turismo Otmar Oduber ta positivo pa introduccion di un visa pa Venezolanonan bishita Aruba. Esaki sinembargo mester ta uno condiciona pa no perhudica e grupo di Venezolano cu si ta beneficia nos isla. Asina e mandatario a bisa NoticiaCla.com e siman aki. Ora cu e ta papia di e grupo no perhudica, e referi na e grupo cu ta biaha y cu tin visa pa e.o. Merca, cu tin propiedad na Aruba y esnan cu ta custumbra di biaha pa nos region sin problema. Pa e grupo cu ta creando problema sinembargo, e mandatario no tin problema pa introduci e visa pa asina frustra e mal intencion di e Venezolanonan aki cu tin impacto negativo riba nos isla. Mes momento e ta conciente cu esaki ta un topico pa Reino Hulandes na Den Haag y no uno cu Aruba por dicidi 'su so' ariba. 

SOSTEN PA MINISTER DOWERS 

E mandatario a mustra su preocupacion pa e situacion di ultimo tempo na Aruba refiriendo na e aumento alarmante di criminalidad riba nos isla, y a bay asina leu di confirma su sostene pa colega di husticia Arthur Dowers. E mandatario di husticia recientemente a splica cu parti di e problema di atraco y criminalidad na Aruba, ta pa responsabilidad di 'un grupo di turista di pais bisiña', esta Venezuela. "Totalmente!", Oduber a contesta NoticiaCla.com riba  e sosten pa declaracion di su colega. E mandatario ademas a mustra cu no por cera wowo pa e situacion actual cu tin, sigur no di e grupo cu 'no por controla loke ta bin di Venezuela'. A mustra cu pa dos aña caba e grupo di Venezuela cu ta bishita Aruba a aumenta drasticamente y for di esey enberdad tin un grupo problematico cu ta causante di problema criminal na Aruba. 

TUR MINISTER MESTER TRAHA HUNTO

E mandatario sinembargo kier pa tur minister uni y traha pa logra resolve e problema actual. Entre otro e ta papia di 'screen pasahero miho na aeropuerto, waf y otro punto di entrada'. E ta conciente cu e ta un asunto dificil, ya cu e mercado di pais bisiña ta esun mas grandi pa loke ta turista cu ta gasta. Y aki ta unda segun e mandatario, mester busca un balansa husto pa evita cu ta stroba e turista cu si ta contribui na e desaroyo economico di nos isla. 

PRO INTRODUCCION VISA PA VENEZOLANONAN

E mandatario ta pro introduccion di visa pa Venezolano, contal cu esaki ta uno condiciona, unda cu por separa esnan cu tin beneficio pa Aruba, manera esnan cu tin p.e. propiedad, inversion y cu tin un pasaporte cu visa pa Merca y otro destinacionan apropia. Pero sigur, e ta pro pa introduci esaki awor, y cu mester bin un combersacion nacional pa por logra esaki y comunica esaki cu gobierno di Reino Hulandes cu finalmente tin e ultimo palabra.