Aruba a recorda esnan cu a muri den di dos Guera Mundial

ORANJESTAD- Dia 4 di mei 2016 nos ta conmemora cu 71 aña pasa a yega un fin na e crueldadnan di Segunda Guera Mundial. Miyones di hende a sacrifica y a perde nan bida, pa awe nos por biba den libertad. E libertad aki ta hopi fragil, si mira con den hopi pais na mundo ainda tin guera, tin genocida y barbaridadnan ta tuma lugar. Den henter Reino e dia aki ta wordo recorda cu un bunita ceremonia y dos minuut di silencio na honor di tur cu a lucha y a muri pa nos libertad. Na Aruba tabatin un ceremonia solemne dilanti e monumento di guera, na unda soldanan di Savaneta Kamp a forma un guardia ceremonial. Un ceremonia cu a wordo organisa pa e fundacion Camarada y cu a cuminsa cu un marcha di silencio. Gouverneur di Aruba sr.F.Refunjol, Vice-Presidente di Parlamento Chris Dammers, Minister Sevinger, representando Prome Minister kende ta den exterior, Comandante di Marinierskazerne Ten Hove, miembronan di Parlamento, representantenan di Hulanda, veteranonan, invitado y hopi interesado tabata presente na e conmemoracion formal aki.