Diputadonan di gobierno nobo di Bonaire ta huramenta dialuna

KRALENDIJK - Dialuna awor e coalicion nobo di Bonaire ta huramenta e respectivo diputadonan. Manera cu NoticiaCla.com a raporta anteriormente, e  acuerdo di gobernacion a keda firma na Bonaire. Fraccion di MPB, fraccion Raphaela y fraccion Bernabela a firma esaki na nomber di nan respectivo lidernan. E informacion cu NoticiaCla.com tin, ta cu dialuna awor e diputadonan nobo ta huramenta.  

FORMACION

Despues cu gobierno di patia di Bonaire, esta e coalicion entre partidonan UPB y Democrat a cay siman pasa diabierna mainta, trabounan a cuminsa tras di cortina, pa forma un gobierno nobo. Fuentenan cerca di e proceso, a confirma e momento ey na NoticiaCla.com cu tabatin tres miembro di MPB hunto cu sra Jeanoushka "Nunu"  Raphaela y posiblemente Esther Bernabela cu a benta e gobierno abou, lo tabata papiando cu otro pa un posibel formacion di 5. 

REUNION DIAMARS ULTIMO

Manera ta conoci tin 9 asiento y pa tin un gobierno, mester tin por lo menos 5. A premira cu pa diamars anochi ultimo, ora cu tabatin e proximo reunion di conseho insular, e formalisacion lo por a tuma lugar di e proximo colegio ehecutivo. Esey sinembargo no tabata e caso. Diaranson merdia ainda e partidonan en cuestion tabata combersa cu otro.