E weekend aki preventief fouilleren pa posesion di arma den dos hot-zone

Posted on 5/4/2016, 11:29 AM AST | Updated on 5/4/2016, 2:16 PM AST

ORANJESTAD - Ministerio Publico y Cuerpo Policial di Aruba ta informa cu Polis lo listra preventivamente (preventief fouilleren) riba posesion di arma den e areanan I y II banda di hotelnan high-rise y King Plaza. 

E accion lo tuma lugar riba diabierna 6 di mei, diasabra 7 di mei y diadomingo 8 di mei 2016. E orarionan ta como lo siguiente: 

Diabierna 6 di mei di 6’or di anochi pa diasabra 7 di mei pa 6’or di mainta Diasabra 7 di mei di 6’or di anochi pa diadomingo 8 di mei pa 6’or di mainta.

 Bou di e asina yama “hot” zone ta cay e siguiente areanan:

Zone I – e area di Ritz Carlton te House of Cheng, bou cual ta cay De Olde Molen te na e toren di observacion di parha. Caya Frans Figaroa, e caminda pa Palmbeach y Sasakiweg tambe ta cay bao di e area aki Zone II - King Plaza.

Den cuadro di e accion di listramento preventivo riba posesion di arma, KPA ta autorisa pa para personanan na manera arbitrario y listra nan pa arma na nan paña. KPA ta tambe autorisa pa listra autonan y otro vehiculonan pa arma. Ademas KPA ta autoriza pa pidi pa habri caha, tas, rugzak y otro pakinan pa listra pa arma. Ministerio Publico a autorisa KPA pa por haci esaki y na su turno, Ministerio Publico a pidi e autorisacion aki na Hues Comisario.